Мұнай және газ

Шикізат кірістерін түрлендіру

ҚМГ ел ішіндегі төрт негізгі мұнай өңдеу зауытын және Румыниядағы екі зауытты басқара отырып, мұнай-газ нарығында Қазақстанның мүдделеріне өкілдік етуде шешуші рөл атқарады. ҚМГ стратегиялық инвесторлармен ынтымақтасып, ірі кен орындарындағы жобаларға қатысады: Теңіз (20%), Қашаған (16,87%) және Қарашығанақ (10%). Компания көмірсутектерді өндірудің, тасымалдаудың және өңдеудің тұрақты циклі арқылы бәсекелестік артықшылықты қолдайды. ҚМГ жер қойнауын пайдалану активтерін сатып алуға өзінің басым құқығын белсенді іске асырады, бұл ресурстар қорын толықтыруға ықпал етеді.

2024 ЖЫЛҒЫ ҚЫЗМЕТТІҢ НЕГІЗГІ КӨРСЕТКІШТЕРІ

2024 жыл тұрақты даму, халықаралық ынтымақтастық және инфрақұрылымды жаңғырту саласындағы елеулі жетістіктермен ерекшеленетін ҚМГ үшін маңызды кезең болды.

2024 жылы ҚМГ Торғай Палеозой, Қаратон Подсолевой, Қаражар және Тайсойған кен орындарында ұңғымаларды бұрғылауды бастады, олардың жиынтық ресурстары мұнай баламасында 800 млн тоннадан астам бағаланады.

Сонымен қатар, Қаламқас-теңіз, Хазар, Әуезов жер қойнауы учаскелерін игеру жобасы аясында Каспий теңізінің қазақстандық секторында базалық жобалау (FEED) бойынша жоба жұмыстары басталды. 2025 жылдың соңына қарай жобаны іске асыру туралы түпкілікті шешім қабылдау жоспарлануда.

2024 жылдың наурыз айында ҚМГ және SOCAR Транскаспий бағытын дамыту шеңберінде Баку-Тбилиси-Джейхан мұнай құбыры арқылы қазақстандық мұнай транзитін жылына 2,2 млн тоннаға дейін ұлғайтуды көздейтін мұнай тасымалдау көлемін кезеңкезеңімен ұлғайту туралы келісімге қол қойылды.

2024 жылы Abu Dhabi Ports Group-пен ынтымақтастық аясында 2023 жылы сатып алынған Taraz және Liwa танкерлері Ақтау-Махачкала бағыты бойынша 874 мың тонна мұнай тасымалдады.

2024 жылдың сәуір айында Сағалық қысымды басқару жобасының нысандарын іске қосу жұмыстары басталды. Болашақ кеңейту жобасы аясында 2025 жылдың қаңтарында жаңа Үшінші буын зауытында шикі мұнай өндіру басталды. Қазіргі уақытта Болашақ кеңейту жобасының толық жобалық қуатына шығу мақсатында өндірісті кезең-кезеңімен ұлғайту жұмыстары жүргізілуде.

Сонымен қатар, есепті жылы газды бөлу кешенін салу жобасы бойынша түпкілікті инвестициялық шешім қабылданды.

ҚМГ халықаралық ынтымақтастықты белсенді дамытуда. Осылайша, 2024 жылы ҚМГ Жылыой жер қойнауын пайдаланудың жаңа жобасы бойынша CNOOC-пен геологиялық барлау саласындағы келісімге, сондай-ақ Мұғалжар жобасы бойынша геологиялық-геофизикалық деректерді зерттеу мақсатында Shell және Chevron компанияларымен бірлескен зерттеулер туралы келісімге қол қойды.

ҚМГ басым бағыттарының бірі өндірістік қуаттарды жаңғырту болып табылады. Өңдеу қуаттарын ұлғайту шеңберінде 2030 жылға қарай Шымкент МӨЗ өнімділігін жылына 12 млн тоннаға дейін ұлғайту жобасы іске асырылуда.

КӨМІРСУТЕК ШИКІЗАТЫНЫҢ ҚОРЛАРЫ

2024 жылы ҚМГ көмірсутектерінің дәлелденген және ықтимал қорлары (2P) мұнай баламасында 716 млн тоннаны құрады, бұл 5 551 млн баррельге тең. 2023 жылмен салыстырғанда қорлардың 2Р деңгейі жер қойнауын пайдаланушыларға экономикалық макро-факторлардың әсері есебінен, сондай-ақ Қарашығанақта газ өндірудің рентабельділік мерзімдерін азайту есебінен 2,4%-ға төмендеді.

PRMS бойынша таза қорлар (2024 жылдың 31 желтоқсандағы жағдай бойынша)

МҰНАЙ МЕН ГАЗДЫ ГЕОЛОГИЯЛЫҚ БАРЛАУ ЖӘНЕ ӨНДІРУ

Жер қойнауын Геологиялық зерттеу инвестициялық жобасы шеңберінде бес учаске бойынша (Мұғалжары, Березовский, Жарқын, Болашақ және Солтүстік Өзен) далалық жұмыстар (сейсмикалық барлау) мерзімінен бұрын жүргізілді. Далалық сейсмикалық барлау жұмыстары және өңдеу, Солтүстік Өзен, Жарық және Березовский учаскелерінде түсіндіру жұмыстары аяқталды. Келісімшарттарды алу және стратегиялық серіктестерді тарту жоспарлануда.

2024 жылы Қызылорда облысында тереңдігі 5500 метр Торғай Палеозой барлау ұңғымасын бұрғылау басталды.

Сондай-ақ 2024 жылы Қаратон Подсолевая учаскесінде тереңдігі 5500 метр болатын алғашқы іздеу ұңғымасын бұрғылау басталды, сынақтарды аяқтау 2025 жылға жоспарланған.

Батыс Қазақстан облысындағы Рожковское кен орнында өнеркәсіптік пайдалануға 5 ұңғыма қосылған, бұл тәулігіне 1,4 млн. м³/тәулік шикі газ өндіруге қол жеткізуге мүмкіндік берді.

Қазіргі уақытта жоба серіктестері «Урал Ойл энд Газ» ЖШС-мен бірлесіп пайдаланылатын ұңғымалар қорын ұлғайтуды, өндіру көлемін, кен орнын игеру тиімділігін арттыруды қамтамасыз ету үшін жұмыс жүргізуде.

«Өріктау» кен орнында 2024 жылы ВУ-6 ұңғымасы іске қосылды, бұл мұнай дебитін тәулігіне 90,3 тонна деңгейінде арттыруға мүмкіндік берді. 2025 жылы пайдалануға беру жоспарланып отырған ВУ-7,8 пайдалану ұңғымаларын бұрғылау жұмыстары жалғасуда. Кен орнын одан әрі дамыту тұжырымдамасын анықтау үшін жобалау жұмыстары жалғасуда.

КӨМІРСУТЕК ШИКІЗАТЫН ӨНДІРУ

2024 жылы ҚМГ мұнай және газ конденсатын өндіру көлемі 23 837 мың тоннаны (тәулігіне 490 мың баррель) құрап, 1,3%-ға өсті. Ілеспе және табиғи газды өндіру көлемі (кері айдау көлеміне дейін) 1,0%-ға өсіп, 9 554 млн м³-ге жетті.

2024 жылғы мұнай және конденсат өндіру көлемі, мың тонна

Теңізде мұнай өндіру 3,7%-ға азайып, 5 562 мың тоннаны (тәулігіне 121 мың баррель) құрады. Ілеспе газ өндіру 5,9%-ға қысқарып, 3 012 млн м3 құрады. Көрсеткіштердің төмендеуі негізінен өндірістік қондырғыларда күрделі жөндеу жүргізуге байланысты.

Қашағанда мұнай өндіру 2 885 мың тоннаны (тәулігіне 62 мың баррель) құрап, 7,2% төмендеді. Газ өндіру 5,1%-ға азайып, 1 863 млн м3 құрады. Төмендеу 2024 жылдың қазан айында слаг-кэтчер қондырғысын жоспарлы күрделі жөндеуден өткізуге байланысты болды.

Қарашығанақта мұнай және конденсат өндіру 1,0%-ға артып, 1 097 мың тоннаны (тәулігіне 24 мың баррель) құрады. Сұйық көмірсутектерді өндіру көлемінің өсуіне Қарашығанақ өндірістік қондырғыларында шикі газды қабатқа кері айдаудың ұлғаюы ықпал етті. Бұл ретте қабатқа кері айдауға дейін газ өндіру 6,9%-ға өсіп, 2 394 млн м³ құрады.

2024 жылы ҚМГ операциялық активтерінде мұнай мен конденсат өндіру 5,4%-ға артып, 14 294 мың тоннаны құрады. «Өзенмұнайгаз» АҚ, «Ембімұнайгаз» АҚ, «Маңғыстаумұнайгаз» АҚ операциялық активтерінде және басқа да операциялық активтерде өндірудің өсуі 2023 жылмен салыстырғанда есепті жылы Маңғыстау атом энергия комбинаты тарапынан электр энергиясының апаттық ажыратылуының төмендеуімен байланысты, сондай-ақ өндіру көлемін ұлғайту үшін операциялық активтер қолданатын қосымша геологиялық-техникалық іс-шаралармен байланысты болды.

ТЕҢІЗ, ҚАШАҒАН, ҚАРАШЫҒАНАҚ МЕГАЖОБАЛАРЫ

ҚМГ стратегиялық инвесторлармен бірлесіп жұмыс істей отырып, Теңіз (20%), Қашаған (16,87%) және Қарашығанақты (10%) қоса алғанда, негізгі мұнай-газ жобаларына белсенді қатысады.

2024 жылы Теңіз кен орнында Болашақ кеңейту жобасын іске асырудың негізгі кезеңдері аяқталды. «Теңізшевройл» ЖШС ұңғымаларды жоғары қысымнан төмен қысымға кезеңкезеңімен ауыстыруды бастап, Сағалық қысымды басқару жобасының объектілерін пайдалануға берді. Механикалық жұмыстар мен негізгі іске қосу іс-шаралары аяқталды. 2025 жылдың II тоқсанында пайдалануға беру жоспарланғанына қарамастан, жаңа үшінші буын зауытында өндіру 2025 жылдың қаңтарында басталды, бұл мұнай өндіруді жылына 12 млн тоннаға арттыруға арналған жобаны іске асырудың маңызды кезеңі болды.

Қарашығанақ кен орнында өндірістің тұрақты деңгейін ұстап тұру бойынша жобаларды іске асыру жалғасуда. 2023 жылы жылына 4 млрд м³ тауарлық газды газ өңдеу зауытын салу жөніндегі тұжырымдама әзірленді, бұл кен орнынан өндірілетін шикі газды және оны қайта өңдеу өнімдерін ақшалы етуге мүмкіндік береді. Газды кері айдау үшін 5-ші компрессорды орнату жобасы (5IC) аяқталып, пайдалануға беруге дайындық актісіне қол қойылды. «Газды кері айдаудың 6-шы компрессорын орнату жобасы» белсенді құрылыс сатысында.

Қашаған кен орнында мұнай өндіру 1-кезеңді игеру аясында жүзеге асырылуда. Қазіргі уақытта алдағы 10 жыл ішінде мұнай мен конденсат өндіру деңгейін тәулігіне ~ 710 мың баррельге (тәулігіне~ 89,5 мың тонна) дейін арттыруға бағытталған 2-кезең жобалары қарастырылуда.

«2А-кезеңі» жобасы қуаттылығы жылына 2,5 млрд м³ болатын үшінші тараптың жоспарланып отырған МӨЗ-не шикі газ жеткізу есебінен өндіруді тәулігіне 6,3 мың тоннаға дейін ұлғайтуды (кен орнындағы жалпы өндіру тәулігіне 500 мың баррды құрайды) көздейді. NCOC пен QazaqGaz база алдындағы жобалау туралы келісімге қол қойды, оның нәтижелері бойынша бұрын әзірленген базалық жобаны түзету және жобаны жүзеге асыру туралы инвестициялық шешім қабылдау жоспарлануда. 2Б-кезеңі жобасы үшінші тарапқа жылына 6 млрд м³ шикі газ жеткізу есебінен мұнай өндіруді тәулігіне 710 мың баррельге дейін ұлғайтуды көздейді. Оператор синергия бойынша алдын ала зерттеулерді аяқтады. Синергия шеңберінде қосылу және жол берулер мүмкіндігін бағалау үшін Теңіз кен орнының акционерлерімен келіссөздер жүргізілуде.

МҰНАЙ ТАСЫМАЛДАУ

ҚМГ мұнай-көлік жүйелері бойынша құрылған көлік қуаттылықтарының жүктемесін ұлғайту бойынша жұмыс, сондай-ақ экспорттық бағыттарды әртараптандыру бойынша жұмыс жалғасуда.

Мұнайды магистральдық және теңіз арқылы тасымалдаудың жалпы көлемі 3,9%-ға 83,5 млн тоннаға дейін ұлғайды. Мұнайды магистральдық құбырлар арқылы тасымалдау көлемі 1,0%-ға ұлғайып, 70,3 млн тоннаны құрады. Өсім Қашаған және Қарашығанақ кен орындарынан мұнайды Атырау-Самара мұнай құбыры бағыты бойынша және Каспий Құбыр Консорциумы бағытында «ҚазТрансОйл» АҚ жүйесі арқылы ауыстырып тиеумен, сондай-ақ мұнай өңдеу зауыттары бағытында ішкі тасымалдау көлемінің ұлғаюымен байланысты.

Есепті жылы мұнайды теңіз арқылы тасымалдаудың жалпы көлемі 22,2%-ға өсіп, 13,2 млн тоннаға жетті. Өсім Джейхан портынан жөнелту көлемінің өсуіне байланысты Жерорта теңізі акваториясы бойынша мұнайды тасымалдаудың ұлғаюына, сондай-ақ Каспий теңізі акваториясындағы Ақтау-Махачкала және Ақтау-Баку бағыттары бойынша көлемдердің ұлғаюымен байланысты болды .

2024 жылы мұнай тасымалдау көлемі

МҰНАЙ ӨҢДЕУ ЖӘНЕ МҰНАЙ ӨНІМДЕРІНІҢ МАРКЕТИНГІ

Қазақстандық МӨЗ-де көмірсутек шикізатын қайта өңдеу көлемі 0,3%-ға ұлғайып, 14 246 мың тоннаны құрады. Қайта өңдеу АМӨЗ, ПМХЗ зауыттарында тиісінше 1,3 және 1,2%-ға өсті, ПКОП зауытында қайта өңдеу 2023 жылғы есепті кезеңмен салыстырғанда 0,1%-ға өсті. 2024 жылы осы МӨЗ деректерінде қайта өңдеу көлемінің өсуі өндірістік қуаттарды кеңейту жобасы бойынша жұмыстарды бастау үшін 2024 жылғы қарашада жоспарлы тоқтатумен байланысты Caspi Bitum-да қайта өңдеудің азаюымен нивелирленді.

Румыниядағы KMG International (Петромидия, Вега) зауыттарында қайта өңдеу көлемі 8,8%-ға азайып, 4 912 мың тоннаны құрады. Қайта өңдеу көлемінің қысқаруы 2023 жылғы 21 маусымда Петромидия зауытында болған өрттен кейін жұмсақ гидрокрекинг қондырғысының кеш қайта іске қосылуына, сондай-ақ есепті жылдың наурыз айында зауыттың жоспарлы күрделі жөндеуге тоқтауына байланысты болды. Қалпына келтіру жұмыстары аяқталғаннан кейін KMG International зауыттары толық қуатта штаттық режимде жұмыс істейді.

2024 жылы көмірсутек шикізатын қайта өңдеу көлемі

Қазақстандық және румындық МӨЗ-де көмірсутек шикізатын қайта өңдеу көлемі 2,2%-ға қысқарды және жиынтық түрде 19,2 млн тоннаны құрады.

Қазақстандық және румындық зауыттарда мұнай өнімдерін өндіру көлемі 1,5%-ға азайып, 2024 жылы 17 894 мың тоннаны құрады. Қазақстандық МӨЗ 13 085 мың тонна мұнай өнімдерін өндірді, бұл өндірістік қондырғылардың тиімділігін арттыру есебінен 2023 жылғы көрсеткіштерден 1,0%-ға артық. KMG International (Петромидия, Вега) зауыттары мұнай өнімдерін 7,9%-ға аз өндірді, бұл негізінен зауыттардағы өңдеу көлемінің тиісті төмендеуіне байланысты 4 809 мың тоннаны құрады.

Ел ішінде тұтынудың болжамды өсуі салдарынан алдағы жылдарға арналған ҚМГ мақсат еткен басты міндеттердің бірі Қазақстанның ішкі нарығын отандық мұнай өнімдерімен қамтамасыз ету жөніндегі мәселені шешу болып табылады, бұл мұнай өңдеу зауыттарының ағымдағы қуаттарын ұлғайту қажеттілігіне алып келеді. Осыған байланысты Шымкент МӨЗ-ының өңдеу қуатын екі есе арттыру жобасы іске асырылуда. Қазіргі уақытта жобалау алдындағы техникалық-экономикалық құжаттаманы түзету аяқталды.

Ішкі нарықта битум тапшылығына байланысты проблемалық мәселелерді шешу үшін ҚМГ «CASPI BITUM» БК» ЖШС-нің мұнай өңдеу қуатын жылына 1,5 млн тоннаға дейін, жол битумын өндірумен жылына 750 мың тоннаға дейін кеңейту жұмыстарын бастады. Бұл жобаны іске асыру 2025 жылдан бастап елдің автожол саласын үздіксіз битуммен қамтамасыз етуге мүмкіндік береді.

ПҚОП қуатын кеңейту мәселесін зерттеу жалғасуда. 2024 жылы жоба бойынша алдын ала ТЭН аяқталды, 2025 жылға жобаның ТЭН әзірлеуі жоспарланған.

2024 жылы ПМХЗ-да Merox технологиясы бойынша сұйытылған көмірсутекті газды тазартудың жаңа кешені іске қосылды, бұл жеңіл фракцияларда күкірттің көп болуымен ерекшеленетін қазақстандық мұнайды қайта өңдеу мүмкіндігін қамтамасыз етеді.

МҰНАЙ-ГАЗ ХИМИЯСЫ

ҚМГ ел үшін мультипликативті әсер ету әлеуеті жоғары мұнай-газ-химия бағытын дамытуды жалғастыруда.

2024 жылы «Газды бөлу кешенінің құрылысы» мен «Полиэтилен» мұнай-газ-химия жобаларына байланысты түпкілікті инвестициялық шешімдер қабылданды. 2024 жылдың қыркүйегінде Атырау облысындағы арнайы экономикалық аймақ аумағында қуаттылығы жылына 1,25 млн тонна болатын полиэтилен өндіретін зауыттың құрылыс жұмыстары басталды.

KPI-дың біріктірілген газ-химиялық кешені 2024 жылы жалпы көлемі 251 мың тонна полипропилен болатын 10 өнім маркасын шығарды. Оның 230 мың тоннасы Қытай, Еуропа, Түркия және Ресейге экспортталды. Ішкі нарыққа жеткізілім импорт үлесін 17%-ға дейін төмендетті, ал 2023 жылы бұл көрсеткіш 34%-ды құрады.

Компанияның бұл ауқымды мұнай-газ-химия жобалары ең алдымен өсіп келе жатқан экспорттық нарықтарға дайын өнімді сатуға бағытталған. Ішкі нарықтың полипропилен мен полиэтиленге деген қажеттіліктерін толық қанағаттандыру жоспарлануда, бұл Қазақстандағы сабақтас салалардың дамуына қосымша экономикалық әсер етеді.

ТҰРАҚТЫ ДАМУ

ҚМГ тұрақты даму қағидаттарын өз қызметіне белсенді түрде интеграциялайды және тұрақты дамудың ұзақ мерзімді мақсаттарын ұстанатынын растай отырып, экологияға теріс әсерді азайту жөніндегі шараларды дәйекті түрде жүзеге асырады.

2024 жылы ҚМГ 2060 жылға дейінгі Төмен көміртекті даму бағдарламасын бекітті.

2024 жылдың мамырында UNEP-ке OGMP 2.0 бағдарламасы бойынша серіктестіктің аясында метан шығарындылары туралы есеп берілді.

Eni-мен күн және газ электр станцияларының құрылысы басталды.

«Мирный» жобасы (1 ГВт) бойынша Total Open компаниясымен келісімді ратификациялау туралы заңға қол қойылды және жаңартылған келісім жобалары мақұлданды.

Sustainalytics рейтингтік агенттігінің 2023 жылғы жаңартылған ESG-тәуекел-рейтингі 32,8 балды құрады, оны жақсарту жоспары іске асырылуда. ҚМГ-ға Carbon Disclosure Project (CDP) халықаралық есептілігі шеңберінде «B» рейтингі берілді. Бұрынғы баға «С» болатын.

2025 ЖЫЛҒА АРНАЛҒАН ЖОСПАРЛАР

2025 жылы «ҚазМұнайГаз» ҰК АҚ геологиялық барлауға, мұнай мен газды қайта өңдеуге және ЖЖМ ішкі нарығын қамтамасыз етуге ерекше назар аударылатын ауқымды жобаларды іске асыруды жалғастырады.

БАРЛАУ ЖӘНЕ ӨНДІРУ

Торғай Палеозой, Қаратон Подсолевой және Қаражар учаскелерінде іздеу ұңғымаларын бұрғылауды аяқтау жоспарлануда. Тайсойған-1 және Тайсойған-2 учаскелерінде қосымша бұрғылау жұмыстары жоспарлануда. Центральное кен орны аймағында 3D сейсмикалық барлау жұмыстары жүргізілетін болады. Сондай-ақ, ГИН лицензияларын алу және Оңтүстік Шу-Сарысу, Береке және Шығыс учаскелерінде сейсмикалық барлаудың басталуы күтілуде.

Жетілген кен орындарын дамытуға ерекше көңіл бөлінеді: Қарсақ, Шығыс Молдабек, Өзен және басқа кен орындарында көлденең ұңғымаларды бұрғылау жалғасуда. Сонымен қатар, Өзен және Қаламқас учаскелерінде полимерлі су басу технологиясы енгізіліп жатыр.

ГАЗ СЕГМЕНТІ

Газ өндіруді ұлғайту үшін Батыс Прорва кен орнында инфрақұрылым құрылысын аяқтап, жаңа ұңғымаларды іске қосу жоспарлануда. Сондай-ақ, Өріктау, Қаламқас және Рожков кен орындарын игеру жұмыстары жүргізілуде.

Қаратөбе, Оңтүстік және Лақтыбай кен орындарының базасында метанол өндіретін қуаттарды салу жоспарлануда, бұл өткізу нарықтарын кеңейтеді және өнімнің қосымша құнын арттырады.

ҚМГ газ инфрақұрылымының негізгі объектілерінде сығымдау сорғы станцияларын жаңғыртуды, сондай-ақ қайта өңдеу қуаттарын кеңейтуді, атап айтқанда, Жаңаөзен қаласында қолданыстағы МӨЗ тозуына байланысты жаңа газ өңдеу зауытын салуды жалғастырады.

МҰНАЙ ТАСЫМАЛДАУ

ҚМГ Транскаспий бағытын дамытуды қоса алғанда, көмірсутектерді тасымалдаудың жаңа бағыттарын әзірлейді. Бірінші кезектегі шаралардың қатарында - «Афрамакс» типті екі танкерді (115 мың тонна дедвейт) сатып алу жөніндегі жобаны іске асыру, сондай-ақ тағы үш ұқсас кемені салу жобасын пысықтау.

ҚАЙТА ӨҢДЕУ ЖОБАЛАРЫ

2025 жылы жобалық-сметалық құжаттаманы аяқтауға және Атыраудағы жаңа полиэтилен зауытының құрылысының белсенді кезеңіне өтуге ерекше назар аударылады. Зауыт 2029 жылы пайдалануға беріледі деп күтілуде, ал жобаға салынған инвестицияның жалпы көлемі 7 млрд доллардан асады.

Полиэтилен өндіру жобасын шикізатпен қамтамасыз ету үшін газды бөлу кешенінің құрылысын жүзеге асыру жалғасады.

Полиэтилентерефталат өндірісі кешенін салу бойынша стратегиялық серіктес тарту жұмыстары жүргізілетін болады.

Ішкі газ нарығына шолу

QazaqGaz 14 облыста және республикалық маңызы бар 3 қалада - Астана, Алматы және Шымкент қалаларында құбырлар мен газ қоймаларын жобалауға, салуды және пайдалануды қаржыландыруға қатысады.

QazaqGaz газ және газбен жабдықтау саласындағы ұлттық оператор ретінде ұзындығы жыл сайын ұлғатын және бүгінгі күні 21,2 мың км-ден асатын (3 мың км газ құбырларын қосқанда) магистральдық газ құбырларының ең ірі желісін және ұзындығы 70,8 мың км-ден асатын газ тарату желілерін басқарады.

2024 ЖЫЛҒЫ ҚЫЗМЕТТІҢ НЕГІЗГІ НӘТИЖЕЛЕРІ

QazaqGaz оң өзгерістерді жүзеге асыруды жалғастырады: өндірістік көрсеткіштер жақсаруда, газ тасымалдау жүйесі жүйелі түрде жаңартылуда, әлеуметтік маңызы бар инфрақұрылымдық жобалар салынып, халықтың өмір сүру сапасын жақсартуға бағытталған бастамаларды жүзеге асырылып жатыр.

ӨНДІРІСТІК БАҒДАРЛАМАНЫ ЖҮЗЕГЕ АСЫРУ

QazaqGaz үшін 2024 жыл бірқатар өндірістік көрсеткіштердің оң динамикасымен белгіленді, атап айтқанда:

• Газ тасымалдау көлемі өткен жылдың ұқсас кезеңінің нақты көрсеткішімен салыстырғанда 11%-ға ұлғайды. Бұл негізінен САЦ бойынша Ресей-Өзбекстан бағытымен тасымалдау көлемінің өсуіне байланысты (2023 жылы тасымалдау тек қазан айында басталған).
• 2023 жылдың ұқсас кезеңімен салыстырғанда ішкі нарыққа газ сатудың өсімі 8%-ды құрады. Бұл сатып алушылардың барлық санаттары бойынша газ тұтынудың артуына байланысты болды.
• Өткен жылдың ұқсас кезеңінің нақты көрсеткішімен салыстырғанда экспортқа газды өткізу көлемінің өсуі Орынбор МӨЗ-де шикі Қарашығанақ газын қабылдаудың шектелуіне және ҚР бүкіл аумағы бойынша қоршаған ортаның қалыптан тыс төмен температурасына байланысты тұтынудың өсуіне байланысты былтырғы жылы газдың негізгі көлемі ішкі нарыққа қайта бөлінуі есебінен болды.
• Газ өндіру көлемінің өсуі Анабай кен орнының іске қосылуына байланысты (2023 жылдың соңында пайдалануға берілді).

РЕСУРСТЫҚ БАЗАНЫ КЕҢЕЙТУ

Жыл сайын газ тұтынудың артуының есебінен ресурстық базаны кеңейту стратегиялық қажеттілікке айналуда. Ағымдағы деректер Қазақстандағы алынатын газ қоры 3,8 трлн м³- ге жеткенін көрсетеді.

2024 жылғы бағалау табиғи газдың қалдық қорының жалпы көлемі 15,2 млрд м³ құрайтынын анықтады. Оның ішінде Амангелді кен орнына 9,52 млрд м³, Жарқұм кен орнына - 0,04 млрд м³, Айрақты кен орнына - 2,41 млрд м³, Анабай кен орнына - 2,16 млрд м³, Барханная кен орнына - 1,07 млрд м³ келеді.

QazaqGaz ресурстық базаны кеңейту жөніндегі Жол картасына сәйкес бірқатар инвестициялық келісімдер мен келісімшарттар жасасты. Осылайша, 2024 жылдың қараша айында ҚР Энергетика министрлігімен Малдыбай (Жамбыл облысы) учаскесі бойынша және Шалқар (Ақтөбе облысы) учаскесі бойынша «ҚОР Мұнай Компаниясы» АҚ стратегиялық серіктесімен бірлесіп барлау және өндіру бойынша келісімшарттарға қол қойылды. Жер қойнауын пайдалануға арналған осы келісімшарттар басым құқық шеңберінде мемлекетпен жүргізілген тікелей келіссөздердің қорытындылары бойынша қол қойған QazaqGaz-тың алғашқы келісімшарттары болып табылады.

Малдыбай учаскесіндегі геологиялық барлау жұмыстарының нәтижелері бойынша төменгі карбонның төменгі визе горизонтының өнімділігі мен газ кен орнының болуы расталды. Оларды әзірлеу үшін №4Г жойылған ұңғыма қалпына келтірілді.

QazaqGaz геологиялық барлау жұмыстарын жүргізу мүмкіндігін анықтау мақсатында елдің шөгінді бассейндеріне тұрақты талдау жүргізеді.

Алынған нәтижелерді басшылыққа ала отырып, 2024 жылы геологиялық барлауға инвестициялар тартуға (100% carry-қаржыландыру шарттарында) және газдың ресурстық базасын дамытуға бағытталған елеулі жұмыстар жүргізілді:

• «Chevron» трансұлттық компаниясымен Ақтөбе облысында KT-III жобасы бойынша Ынтымақтастық туралы келісімге қол қойылды. Инвестор 3D сейсмикалық барлау деректерін қайта өңдеу және түсіндіру жұмыстарын бастады.
• Стратегиялық әріптес «ҚазАзот» АҚ компаниясымен Үстірт-Бозашы шөгінді бассейнінің газды аймағында орналасқан Северный-2 учаскесі бойынша Ынтымақтастық туралы келісімге қол қойылды.
• Маңғышлақ шөгінді бассейнінің газды аймағында орналасқан Аққұдық учаскесі бойынша «ҚОР» Мұнай Компаниясы» АҚ стратегиялық серіктесімен Ынтымақтастық туралы келісімге қол қойылды.

Сонымен қатар, Маңғыстау облысында ГИН лицензиясы аясында далалық сейсмикалық барлау жұмыстарының басталуына экологиялық рұқсат алу бойынша жұмыстар жүргізілді.

КӨМІРСУТЕК ШИКІЗАТЫН ӨНДІРУ

2024 жылы «QazaqGaz барлау және өндіру» ЖШС бойынша газ және газ конденсатын өндірудің жоспарланған көлемі тиісінше 290,4 млн м3 және 12,3 мың тоннаны құрады.

Жоспарланған көрсеткіштердің нақты орындалуы тиісінше - 298,9 млн м³ және – 13,1 мың тоннаны құрады: асыра орындау - тиісінше 2,9% және 6,7%.

2024 жылы Анабай кен орнында №17 өнімді пайдалану ұңғымасын бұрғылау аяқталды, ұңғыма тәулігіне 120 мың м³ бастапқы дебитімен пайдалануға берілді.

2025 жылы «QazaqGaz барлау және өндіру» ЖШС бойынша 10 ұңғыманы бұрғылау жоспарлануда: Амангелді к. үшін 3 ұңғыма, Айрақты к. үшін 3 ұңғыма, Анабай кен орнынла 3 ұңғыма, Барханная к. үшін 1 ұңғыма.

ГАЗДЫ ӨҢДЕУ

Мемлекет басшысының Қашаған кен орнында газ өңдеу зауыттарын (жобалық қуаттылығы жылына 1 млрд м³ шикі газ және 2,5 млрд м³) салу жөніндегі тапсырмасын орындау шеңберінде QazaqGaz және UCC Hold1ing катарлық серіктесі арасында бірқатар келісімдерге қол қойылды.

Бірлескен іске асыру келісімдерінің аясында инвестициялар тартылады, сондай-ақ жобалар үшін қаржыландыру ұйымдастырылады. Аталған зауыттардың құрылысы Қазақстандағы тауарлық газдың ресурстық базасын ұлғайтуға бағытталған.

2024 жылғы 31 желтоқсандағы жағдай бойынша кестеге сәйкес шикі газдың қуаттылығы жылына 1 млрд м³ болатын «Қашаған» МӨЗ негізгі технологиялық титулдарының іргетасын қалау бойынша жұмыстар аяқталды. Іргетастар жабдықты одан әрі орнатуға дайын деп танылды және құрылыстың осы кезеңіне қойылатын талаптарға толық сәйкес келеді.

СҰЙЫТЫЛҒАН МҰНАЙ ГАЗЫ

Солтүстік Каспий жобасының серіктестері мен QazaqGaz арасындағы келіссөздердің қорытындысы бойынша ҚР Энергетика министрлігі мен «PSA» ЖШС қатысуымен тараптар Қашаған сұйытылған мұнай газын сатып алу-сату мәмілесінің шарттары бойынша келісімге келді. Бұл қадам оның Қазақстанның ішкі нарығының шегінде жоғары сұранысына байланысты болды.

Келісімшартқа қол қою жоба бойынша түпкілікті инвестициялық шешім қабылдауға бағытталған ынтымақтастық шеңберіндегі маңызды кезең болды. Келісім шарттарына сәйкес, Қашаған сұйытылған мұнай газын жеткізу инфрақұрылымдық жұмыстар аяқталғаннан кейін 2027 жылға қарай жылына 700 мың тоннадан астам көлемде максималды жобалық қуатқа шығуы 2025 жылдың соңына жоспарланып отыр.

Қазіргі уақытта QazaqGaz Қашаған сұйытылған мұнай газын қабылдауды, сақтауды, ауыстырып тиеуді және фракциялауды қамтамасыз ету үшін қажетті технологиялық жабдыққа тапсырыстарды жобалау және орналастыру бойынша жұмыстар жүргізуде. Бұл жеткізілімдер Қазақстан өңірлерінің әлеуметтік-экономикалық жағдайына жағымды әсер етеді, сұйытылған мұнай газының тапшылығын азайтуға және елдегі газ-химия саласының дамуына ықпал етеді.

ГАЗ ТАСЫМАЛДАУ ИНФРАҚҰРЫЛЫМЫН ДАМЫТУ

Газ көлігі инфрақұрылымын дамыту аясында «Алматы-Байсерке-Талғар» магистральдық газ құбырының екінші желісінің құрылысы аяқталды. Бұл ЖЭО үшін газ инфрақұрылымының төртінші нысаны. Оның ұзындығы - 62,4 км, диаметрі - 530 мм, өткізу қабілеті - 1 000 000 м³/сағ.

Осылайша, QazaqGaz Алматыдағы ЖЭО-2 және ЖЭО-3 үшін сыртқы газ инфрақұрылымының құрылысын толығымен аяқтады. Жоба мемлекет Басшысының Алматы ЖЭО-ны газға ауыстыру туралы тапсырмасы бойынша мерзімінен бұрын іске асырылды.

Алматы ЖЭО-ны көмірден газға ауыстыру бизнесті дамытуға және жаңа жұмыс орындарын құруға мультипликативті әсер етеді, сондай-ақ аймақтағы экологиялық жағдайды жақсартады.

124 мың тұрғыны бар Ақсу, Сарқан, Алакөл аудандарының 66 елді мекенін табиғи газбен қамтамасыз ететін «Талдықорған - Үшарал» жаңа магистральдық газ құбырының құрылысы басталды. Бұл аймақтың тұрақты дамуына және өмір сүру сапасын жақсартуға ықпал етеді. Қосымша оң нәтиже іскерлік белсенділіктің өсуі, жаңа жұмыс орындарын құрумен шағын және орта бизнесті дамыту түрінде болады.

Катарлық UCC Holding компаниясымен компрессорлық станция мен магистральдық газ құбырларын салу шеңберінде ынтымақтастық туралы бірқатар келісімдерге қол қойылды. Келісімдердің бірі Ақтөбе және Қостанай облыстарында «КС-14» жаңа компрессорлық станциясы мен «КС-14 - Қостанай» магистральдық газ құбырын салу үшін инвестициялар тартуды көздейді. Бұл жоба стратегиялық маңызға ие және Қостанай өңірінің газына деген перспективалық қажеттілікті жабуға және ыстық брикеттелген темір шығаратын зауыттар, «KIA» автомобильдерін шығаратын зауыттар, іштен жанатын қозғалтқыштар үшін шойын құймаларын дайындау және т. б. сияқты ірі өндірістерді газбен қамтамасыз етуге бағытталған.

«Бейнеу-Бозой-Шымкент» МГ қолданысындағы 1-ші желісінің жүктемесін назарға ала отырып, өндіруші қуаттарды іске қосу жөніндегі жаңа энергетикалық жобаларды қоса алғанда, елдің оңтүстік және орталық өңірлерін газбен жабдықтауды дамыту үшін ұзындығы 1450 км «Бейнеу-Бозой-Шымкент» магистральдық газ құбырының 2-ші желісін салуға қатысты катарлық әріптеспен екінші келісімге қол қойылды. 2024 жылы жоғарыда аталған жобалар бойынша техникалық-экономикалық негіздемелерді әзірлеу аяқталды, оларды ведомстводан тыс кешенді сараптамадан өту мақсатында «Мемсараптама» РМК порталына жүктеу жүзеге асырылды.

ГАЗ ТАСЫМАЛДАУ ЖҮЙЕСІН ЖАҢҒЫРТУ

QazaqGaz құрылған сәттен бастап елдің энергетикалық қауіпсіздігін нығайту және халықтың өмір сүру сапасын жақсарту бойынша жүйелі түрде жұмыс жүргізіп келеді. QazaqGaz қатысуының кең географиясы елді мекендерді газдандыру деңгейінің жыл сайын өсуіне ықпал етеді. Бүгінгі таңда Қазақстанның газдандыру деңгейі 62,4%-ды (немесе 12,3 млн адам) құрайды.

Газ саласында маңызды инфрақұрылымдық жобаларды: Қазақстанның солтүстікшығыс аймақтарын газдандыру, «Орталық Азия - Орталық» магистральдық газ құбырын күрделі жөндеу, «Бейнеу - Бозой - Шымкент» магистральдық газ құбырының 2-ші желісін салу, «Ақтөбе - Қостанай» магистральдық газ құбыры және КС-14 компрессорлық станциясын жүзеге асыру бойынша жұмыс жалғасуда.

Айта кету керек, қазақстандық тұтынушыларға табиғи газды жеткізуге арналған тарифтің шығыны мәселесі әлі де өзекті болып отыр. 2024 жылы QazaqGaz-тың шығын көлемі Қазақстан бойынша орта есеппен көтерме бағаның жеткіліксіз өсуіне (14,6%) байланысты 178,5 млрд теңгені құрады.

ТРАНЗИТТІК ӘЛЕУЕТТІ НЫҒАЙТУ

QazaqGaz транзиттік әлеуетті нығайту бойынша жұмысты мақсатты түрде жүргізеді.

Атап айтқанда, ресейлік газды Өзбекстан Республикасына тасымалдауға «Орта Азия- Орталық» магистральдық газ құбырын (бұдан әрі - «САЦ» МГҚ) дайындау бойынша жұмыстарды ұйымдастыру жөніндегі бірлескен іс-шаралар жоспары әзірленді және бекітілді, оның ішінде ынтымақтастықтың 2 кезеңі қамтылған:

1-кезең. Біріктірілген арнайы маршрут «САЦ-4»/МГҚ «САЦ-5» МГҚ бағыты. Осы кезең аясындағы барлық іс-шаралар дер кезінде аяқталды, ресейлік газдың транзиті 2023 жылдың 1 қазанында басталды.

Газ транзиті көлемінің ұлғаю динамикасы байқалады. Егер 2023 жылы транзит көлемі 1,3 млрд м³ құраса, онда 2024 жылдың қорытындысы бойынша бұл көрсеткіш 5,6 млрд м³-ге жетті. 2025 жылға жоспарланған газ транзитінің көлемі - 5,5 млрд м³.

2-кезеңді іске асыру шеңберінде «САЦ-4» МГҚ арнайы бағыты бойынша транзитті жылына 11 млрд м³ дейін ұлғайту жоспарлануда.

Ресейлік құбыр газын тасымалдаудың қажетті көлемін қамтамасыз ету мақсатында 2024 жылы жөндеу жұмыстары басталды, ол 2026 жылдың соңына дейін жалғасады.

Ресей газын Өзбекстан мен Қырғызстан бағыттары бойынша транзиттік тасымалдау келісілген көлемде жүзеге асырылды.

ГАЗДЫ ЭКСПОРТҚА ЖӘНЕ ІШКІ НАРЫҚҚА ӨТКІЗУ

Осы бағыт бойынша өзара тиімді ынтымақтастық жөніндегі бастаманы дамыту шеңберінде мынадай міндеттер іске асырылды:

• «QazaqGaz» ҰК" АҚ мен "Газпром экспорт" ЖШҚ арасында 2023-2024 жылдары газ саласындағы ынтымақтастық мәселелері бойынша ҚР Үкіметі мен «Газпром» ЖАҚ арасындағы Хаттамада бекітілген уағдаластықтарды іске асыру мақсатында Қазақстанға ресейлік газын жеткізуге 2 келісімшарт жасалды;
• 2024 жылғы 27 желтоқсанда «QazaqGaz» ҰК» АҚ мен «Газпром экспорт» ЖШҚ арасында ҚР Үкіметі мен «Газпром» ЖАҚ арасындағы келісімде 2025-2026 жылдарға арналған Ресей газын ҚР-ға жеткізу келісімшартына қол қойылды.

2024 жылы келесі негізгі нәтижелерге қол жеткізілді:

• «PetroChina International Alashankou Company Limited» компаниясымен табиғи газды сатып алу-сату шарты шеңберінде жеткізудің бірінші жылындағы жылдық келісімшарттық саны 5,5-6,2 млрд м³-ге дейін ұлғайтылды (2023–2026жж.).
• Жазғы кезеңде экспортқа газ жеткізу ұлғайтылды, бұл QazaqGaz тобы бойынша экспорттық операциялардан түсетін түсімді ұлғайтуға мүмкіндік береді.
• Экспорттық жеткізілімдер кезінде газдың жеткіліксіз жеткізілуі және сапасының нашарлауы үшін жеңілдіктер төмендетілді.
• Экспорттық жеткізілімдер ішкі нарыққа зиян келтірмей келісілген көлемде жүзеге асырылды.
• Қытайға экспорттық әлеуетті арттыру үшін ресейлік газды жеткізу ұйымдастырылды.
• Орынбор ГӨЗ-де жоспардан тыс жөндеу жұмыстары кезінде өтемдік жеткізілімдер қарастырылған.
• QazaqGaz газды халықаралық нарықтарға экспорттау көлемін ішкі нарыққа зиян келтірместен сақтайтынын атап өту маңызды.

ТҰРАҚТЫ ДАМУ

Соңғы жылдары QazaqGaz тұрақты даму саласындағы бірқатар ірі жобаларды сәтті жүзеге асырды. Екі жыл бойы Компания GRI (Global Reporting Initiative) стандарты бойынша есептілікті қалыптастыру және жариялау арқылы үздік халықаралық тәжірибелерді ұстанады. Осылайша, 2024 жылдың қорытындысы бойынша QazaqGaz-дың 2032 жылға дейінгі кешенді Даму стратегиясын іске асыру шеңберінде Компания БҰҰ-ның Жаһандық келісімшартына қосылды.

Сонымен қатар, 2024 жылы QazaqGaz Қазақстан Республикасының «PARYZ» жұмыс берушілердің (кәсіпкерлердің) Ұлттық Конфедерациясына кірді. Мұның бәрі компанияның ESG-қағидаттары мен бизнестің әлеуметтік жауапкершілігін ұстанатындығын көрсетеді.

Нәтижесінде, QazaqGaz ESG-рейтингіндегі орнын MorningStar Sustainalytics нұсқасы бойынша 19,2-ден 18,2-ге дейін көтерді.

АА деңгейінде MSCI негізгі рейтингтік агенттігінен жоғары баға алу да маңызды жетістік болып табылады.

2024 жылғы ақпаратты ашу қорытындысы бойынша CDP Климаттық бағдарламасы шеңберінде QazaqGaz климаттық рейтингтегі өз көрсеткіштерін жақсартып, өз позициясын «B» деңгейіне дейін үш тармаққа көтерді.

2025 ЖЫЛҒА АРНАЛҒАН ЖОСПАРЛАР

QazaqGaz Даму стратегиясы аясында келесі бағыттар бойынша жұмыс жоспарланған:

• тауарлық газдың ресурстық базасын ұлғайту, газдың ішкі нарығын дамыту, газ транзиті мен экспортын дамыту, газ химиясы және терең өңдеу, инвестициялық және операциялық тиімділік жөніндегі жұмысты қоса алғанда, ҚР газ саласын дамытудың өзекті Кешенді жоспарында көзделген іс-шараларды іске асыру;
• Қашаған кен орнында МӨЗ салу бойынша жобаны іске асыру;
• КС-14 жаңа компрессорлық станциясы мен «КС-14-Қостанай» магистральдық газ құбырын салу және «Бейнеу - Бозой - Шымкент» магистральдық газ құбырының екінші желісін салу жөніндегі жобалармен жұмысты жалғастыру;
• «Талдықорған-Үшарал» магистральдық газ құбырының құрылысы, оның аяқталуы Жетісу облысының 66-ға жуық елді мекенінің газға қолжетімділігін қамтамасыз етуге мүмкіндік береді.

Химиялық өндірістің дамуы

2024 ЖЫЛДЫҢ НЕГІЗГІ НӘТИЖЕЛЕРІ

2024 жылы өндірістік және қаржылық көрсеткіштерге қол жеткізе алмаудың негізгі себебі нарық конъюнктурасының өзгеруі, серіктестер тарапынан шарттық міндеттемелердің орындалмауы, өндірістік жабдықтардың істен шығуы, сондай-ақ ҚР-ның «Электр энергетикасы туралы» Заңына түзетулер енгізу болды.

Атап айтқанда, агрохимиялық өнім шығаратын еншілес ұйым («ХИМ-плюс» ЖШС) бәсекеге қабілетсіз сату бағасына және соның салдарынан сатып алушылардың әлсіз сұранысына байланысты жоспарланған өндірістік көрсеткіштерді орындамады. Қойма бөлмелерінің тауарға толуы және алдыңғы кезеңдерде сатып алынған шикізаттың болуын ескере отырып, 2024 жыл ішінде өндіріс жүзеге асырылмады, өндіріс кезеңнің соңына дейін 175,76 мың литр көлемінде ғана қалпына келтірілді.

2024 жылдың қорытындысы бойынша күкірт қышқылын өндіру көрсеткіштері («SSAP» ЖШС) кәсіпорынның жылдық жобалық қуаттылғысынан 2%-ға асып түсті. Өндіріс көрсеткіштерінің жақсаруы ай сайынғы жоспарлы-алдын алу жұмыстарын жүргізу уақытын дұрыс жоспарлаудың және соның салдарынан жұмсалған уақытты қысқартудың арқасында мүмкін болды.

«SSAP» ЖШС жылды оң қаржылық көрсеткіштермен аяқтады, таза пайда жоспары 1 069,8 млн теңгеге немесе 83%-ға асыра орындалды.

2024 жылдың нәтижелері бойынша «KUS» ЖШС 2023 жылдың 1 шілдесінен бастап Электр энергиясын бірыңғай сатып алушының тетігін енгізу себебінен электр энергиясын өндіру мен өткізудің жоспарлы көлемі орындалмады. Электр энергиясын сатудың осы тетігінің әсерін азайту мақсатында «KUS» ЖШС 2024 жылғы қыркүйекте «КАЗ ЭКОТРАНС» ЖШС-мен шарт жасасты, ол теңгерімдеуші энергия нарығында провайдер болып, оны одан әрі іске асыру үшін «KUS» ЖШС өндіретін электр энергиясының қалдығын сатып алды.

2024 жылғы желтоқсанда Электр энергияның көтерме сауда нарығын ұйымдастыру және жұмыс істеу қағидаларына өзгерістер енгізілді, атап айтқанда Жылу электр орталықтарынан бірыңғай сатып алушының электр энергиясын сатып алу басымдығы өзгерді.

Қағидалардың жаңа редакциясына сәйкес тәуліктік тұтыну кестесін жабуға арналған техникалық минимумнан жоғары өндірілген ЖЭО нарықтың қажеттілігі бойынша «KUS» ЖШС-мен бір мезгілде сауда-саттықта сатылады.

«KUS» ЖШС Қазақстанның батыс өңірі бойынша ең төменгі шекті тарифпен электр энергиясын сататынын ескере отырып, компания электр энергиясын өндірудің қолда бар қуаттарының барынша жүктелуін қамтамасыз етеді.

КҮКІРТ ҚЫШҚЫЛЫН ӨНДІРУ, ЖЫЛЫНА 360 МЫҢ ТОННА («SSAP» ЖШС-ІН КЕҢЕЙТУ)

Жоба Степногорск қаласында жұмыс істеп тұрған күкірт қышқылы зауытының екінші желісін орнатуды және өндірістік қуаттылықты 2 есеге арттыруды көздейді. Жобаны жүзеге асыру қорытындысы бойынша кәсіпорынның жылдық қуаттылығы еліміздің солтүстік өңірлеріне бағытталған 360 мың тонна күкірт қышқылын құрайды.

2024 жылы техникалық-экономикалық негіздемеге (ТЭН) оң қорытынды алынды.

КҮКІРТ ҚЫШҚЫЛЫН ӨНДІРУ, ЖЫЛЫНА 800 МЫҢ ТОННА («TQZ» ЖШС ЖОБАСЫ)

«TQZ» ЖШС Түркістан облысы Тайқоңыр кентінде күкірт қышқылы зауытын салу жобасының операторы болып табылады. Кәсіпорынның өндірістік қуаты жылына 800 мың тонна күкірт қышқылын құрайды. Жоба уран өндіру саласының күкірт қышқылының импортына тәуелділігін төмендетуге бағытталған.

Жобаны «Қазатомөнеркәсіп-SaUran» ЖШС-і (40%) Asia Pipeline жеке серіктесімен (60%) бірлесіп жүзеге асыруда.

Бұл ретте «Қазатомөнеркәсіп-SaUran» ЖШС үлесінің 40%-ы SK Ondeu компаниясының сенімгерлік басқаруында.

2024 жылғы 22 қаңтарда жобаның ТЭН-і аяқталды. Жобаны іске асыру аясында серіктестер жобаны іске асыру туралы келісімге, off take-шарт пен стратегиялық әріптестік туралы келісімге келісіп, қол қойды.

ЭЛЕКТР ЭНЕРГИЯСЫН ӨНДІРУ (ГТЭС ЖОБАСЫ (165 МВТ))

Электр қуаты 165 МВт болатын, жоспарланған бу-газ электр станциясы (БГТЭС) Атырау облысындағы «Ұлттық индустриялық мұнай-химия технопаркі» арнайы экономикалық аймағының стратегиялық мұнай-газ химия кәсіпорындары мен басқа да қатысушыларын үздіксіз қамтамасыз етуге арналған. Жаңа энергоблок қолданыстағы қуаты 310 МВт БГТЭС-ті толықтырады.

2024 жылғы маусымда Мемсараптама РМК-дан ТЭН-ге оң қорытынды алынды. Жоба аясында құрылысқа коммерциялық ұсыныстар түсті.

Қазіргі уақытта жобаның операторы мен орналасқан жерін анықтау мақсатында АМӨЗ-дегі қуаты 154 МВт болатын ГТЭС пен қуаты 165 МВт БГТЭС жобалары арасында салыстырмалы талдау әзірлеу бойынша жұмыс жүргізілуде.

БУТАДИЕН ЖӘНЕ ОНЫҢ ТУЫНДЫЛАРЫН ӨНДІРУ

«Бутадиен» ЖШС - Қазақстан Республикасы мен Ресей Федерациясының мұнай-газ химиясы, атап айтқанда бутадиен каучуктарын өндіру саласындағы бірлескен жобасы. Жоба операторы «Татнефть» ЖАҚ (75%) мен SK Ondeu (25%) арасындағы бірлескен кәсіпорын - «Бутадиен» ЖШС болып табылады.

Жоба Қазақстан Республикасындағы мұнай химиясын дамыту жөніндегі арнайы экономикалық аймақтың аумағында Атырау қаласынан 43 шақырым жердегі Қарабатан учаскесінде орналасқан.

Жобада ТШО-дан бутан қоспасының шикізатын қайта өңдеу жолымен бутадиен және оның туындыларын өндіру жоспарлануда.

Іске асырылған жоба аясында өнімнің бес түрлі түрін өндіру жоспарлануда:

• Стирол-бутадиен-стиролды ТЭП 30 мыңға дейін;
• Дивинил-стиролды синтетикалық каучук 60 мыңға дейін;
• Бутадиен 45 мыңға дейін;
• Изобутан-изобутилен фракциясы 130 мыңға дейін;
• Метил-терт-бутил эфирі 40 мыңға дейін.

Жоспарланған өткізу нарықтары: Еуропа, ТМД, Қытай, Түркия және басқа да нарықтар.

Конкурстық рәсімдердің қорытындысы бойынша 2024 жылғы 1 қазанда қытайлық Tianchen Engineering Corporation компаниясымен кеңейтілген базалық жобаны әзірлеуге келісімшартқа қол қойылды. Қазіргі уақытта кеңейтілген базалық жоба әзірленуде.

КҮКІРТ БОЙЫНША САУДА ИНТЕГРАЦИЯСЫ

2011 жылғы 3 наурыз күні компания мен «Теңізшевройл» ЖШС арасында жасалған комиссия шартына сәйкес, SK Ondeu 2024 жылдың қорытындысы бойынша қазақстандық күкірт қышқылы зауыттарына 222,3 мың тонна күкірт сатылды.

2025 жылы қазақстандық күкірт қышқылы зауытының жоспарында 252 мың тонна күкіртті сату.

2025 ЖЫЛҒА АРНАЛҒАН ЖОСПАРЛАР

Күкірт қышқылын өндіру жөніндегі жобаның жобалау-сметалық құжаттамасын әзірлеу бойынша жұмыстардың басталуы («SSAP» ЖШС кеңейту) қосымша келісімдер алғаннан және тендерлік рәсімдер жүргізілгеннен кейін 2025 жылдың 2-3 тоқсанында күтіледі. Құрылысты аяқтау және жобалық қуатқа шығу 2028 жылға жоспарланған.

«TQZ» ЖШС жобасы бойынша 2025 жылы кредитормен несиелік келісім жасасу, жобаның жобалық-сметалық құжаттамасын әзірлеуді аяқтау, құрылыс жұмыстарын бастау және жабдыққа тапсырыс орналастыру жоспарланған. Өндірісті іске қосу 2026 жылдың желтоқсан айына жоспарланған.

2025 жылы кеңейтілген базалық жоба нәтижелерінің қорытындысы бойынша Бутадиен жобасы бойынша түпкілікті инвестициялық шешім қабылдау және жобаны іске асырудың келесі кезеңі үшін мердігерді таңдау жоспарланған.

2025 жылы Түркістан облысы, Тайқоныр кентінде қуаттылығы жылына 800 мың тонна күкірт қышқылын өндіретін зауытты қарыздық қаржыландыруды тарту және құрылысын бастау көзделген.