«CASPI BITUM» БК» ЖШС «Нафта Альянс» ЖШС қорынан 650 тонна көлемінде жол битумының алғашқы партиясын экспортқа (Самарқанд, Өзбекстан Республикасы) жөнелтті. Зауыттың аталмыш өнімі өзінің техникалық сипаттамасы бойынша жол-климаттық аймақтардың барлығына дерлік сәйкес келеді.

Естеріңізге салайық, Ақтау битум зауыты «ҚазМұнайГаз – өңдеу және маркетинг» АҚ («ҚазМұнайГаз» ҰК» АҚ-ның еншілес компаниясы) мен «CITIC Kazakhstan» ЖШС-ның бірлескен кәсіпорны болып табылады. Ол Үдемелі индустриялық-инновациялық даму жөніндегі мемлекеттік бағдарламасы (2010 – 2014 жж.) шеңберінде 2013 жылы жол саласының жоғары сапалы жол битумына қажеттілігін қамтамасыз ету мақсатында салынды. Зауыттың жобалық қуаты – жылына 1 млн тонна өңделген шикі мұнайды құрайды. Зауытта битумның екі түрі шығарылады: мұнайлы тұтқыр битум және мұнайлы модификацияланған, жол битумы. Зауыт 2016 жылдың ішінде 623,5 мың тонна мұнай өңдеп, 110,9 мың тонна жол битумын шығарды.