Астанада, 30-31 наурыз аралығында, «Корпоративтік басқару: Қазақстанның инвестициялық тартымдылығына жаңа көзқарас» ұлттық форумы өтіп жатыр.

Форумды ҚР Премьер-Министрінің бірінші орынбасары Бақытжан Сағынтаев пен Дүниежүзілік Банк тобына кіретін Халықаралық қаржылық корпорацияның Орталық Азия бойынша IFC аймақтық жетекшісі Моаззам Мекан ашты. Спикерлер корпоративтік басқару қағидаттарын әлемдік стандарттарға сәйкес енгізу қазақстандық компаниялардың инвестициялық тартымдылығының кілті болып табылатынын атап өтті.

«Самұрық-Қазына» Ұлттық әл-ауқат қоры корпоративтік басқаруды жетілдіруді өзінің стратегиялық басымдығы ретінде қарастырып отыр.

«Корпоративтік басқаруды жетілдіру – «Самұрық-Қазына» қоры Трансформация бағдарламасының басым бағыттарының бірі. Осы орайда Қор Корпоративтік басқару кодексін жасады, онда Экономикалық ынтымақтастық және даму ұйымының стандарттары мен озық халықаралық тәжірибелер ескерілді. Кодекс компанияларды кәсіби директорлар кеңестері арқылы басқару, тәуекелдерді басқару, тұрақты даму мен ашықтықты арттыру, акционерлермен әділ қарым-қатынасты жолға қою сияқты негізгі бағыттарды басшылыққа алады», - деді «Самұрық-Қазына» АҚ Қаржы және операцияларды басқарушы директор Елена Бахмутова.

Қор мен оның қоржын компаниялары жаңа Кодексті іс жүзіне асыруды белсенді жүргізіп жатыр. Қор жоғары кәсіби, теңгерімді құрам жасақтау арқылы қоржын компаниялардағы директорлар кеңесінің ролін арттырып, олардың жұмыс тиімділігіне талапты күшейтеді. Бұл шараның «Самұрық-Қазына» АҚ компанияларының IPO-ға шығуына және Астана қаласында Халықаралық қаржы орталығының құрылуына байланысты маңызы арта түспек.

2013 жылы, Ұлыбритания Премьер-Министрінің Қазақстанға сапары кезінде «Самұрық-Қазына» АҚ мен Ұлыбритания директорлар институты (IoD) арасында ынтымақтастық туралы келісімге қол қойылған болатын. Аталған ынтымақтастық аясында Қор тұңғыш рет, қазақ және орыс тілдерінде «Тиімді директорлар кеңесі» атты IoD басылымын жарыққа шығарды. Жинақта директорлардың өз қызметін тиімді орындауы, қызметте кездесетін өзекті мәселелерді оңтайлы шешу жолдары туралы іс-тәжірибелер топтастырылған.

«IFCкорпоративтік басқарудың ең үздік тәжірибелерін енгізу арқылы, бизнесті тұрақтандыру мақсатында, Қазақстанның жеке секторындағы компаниялармен бірлесіп жұмыс істеп келеді. Бұл тәуекелдерді азайтуға, капиталға қиындықсыз қол жеткізуге және басшылықтың теріс әрекеттерінен қорғануға мүмкіндік береді», - деп атап өтті Моаззам Мекан.