2015 жылғы 13 желтоқсанда, Пекинде Қазақстан-Қытай іскерлік кеңесінің (ҚҚІК) ІII отырысы өтті. Іс-шараға Қазақстанның Премьер-Министрі Кәрім Мәсімов қатысты. Биылғы жылы Кеңестің отырыстарына Қазақстан мен Қытайдың 350 компаниясы мен мемлекеттік мекемелері ат салысқан.

Қазақстан мен Қытай арасындағы ынтымақтастық ҚҚІК пленарлық отырысында, «Қордың жекешелендіру бағдарламасы, «Жасыл экономика – тұрақты дамудың жаңа бағыты», «Инфрақұрылым, инновациялар, логистика» атты үш панельдік сессияда талқыланды.

«Самұрық-Қазына» АҚ Басқарма төрағасы, Кеңестің тең төрағасы Өмірзақ Шөкеев Қазақстан-Қытай іскерлік кеңесінің екі жыл ішінде іскерлік байланыстарды күшейтуде өз тиімділігін көрсеткенін айтты. «ҚҚІК жұмысы аз ғана уақытта үлкен қарқын алды. Қазақстандық, қытайлық бизнес-орта сенімді, жемісті жұмыс істеуге мүдделі. Бізді біріктіретін жобалар көп», - деп атап өтті Ө.Шөкеев.

Отырыс нәтижесінде «Самұрық-Қазына» компаниялар тобы мұнай мен газ, телекоммуникация мен энергетика саласында 4 млрд. доллардың келісімдерін бекітті. «ҚазМұнайГаз» ҰК» АҚ мен Sinopec корпорациясының арасында мұнайды барлау мен өндіру, мұнай химиясы, өзге энергия көздері бойынша ынтымақтастық жасалды.

«Қазатомпром» ҰАК» АҚ мен China General Nuclear Power Corporation Қазақстанда жылу шығаратын құралдар зауытын салуды, уран кен орындарын бірлесіп игеруді жоспарлап отыр. «Қазақтелеком» АҚ мен China Telecom Global Limited Қазақстанның ауылдық елдімекендерін талшықты-оптикалық желімен қамту туралы меморандумға қол қойды.

ҚҚІК Қазақстан Республикасының Президенті Н.Назарбаевтың 2013 жылғы сәуірдегі ҚХР-ға сапары барысында, екі ел басшыларының тапсырмасымен құрылғаны белгілі. Оның мақсаты сауда-экономикалық өзара іс-қимылға серпін беру, экономиканың түрлі секторындағы ынтымақтастықты нығайту болып табылады.