9-10 сәуір күндері «Самұрық-Қазына» АҚ жұмыс тобы Қор басшысы Өмірзақ Шөкеевтің жетекшілігімен Силикон жазығындағы (Калифорния, АҚШ) кәсіпорындарды аралап қайтты.

«Самұрық-Қазына» тобындағы бірқатар компаниялардың жетекшілерінен тұратын жұмыс тобы Стэнфорд және Беркли сынды белді университеттер мен Tesla Motors, SolarCity қатарлы танымал инновациялық компаниялардың жұмысымен танысты.

Тараптар таза энергетика, газ-химия, көлік, медицина, ауыл шаруашылығы мен білім беру, ІТ саласын дамытуда әріптестік орнату мүмкіндіктерін талқылады. Атап айтқанда Силикон жазығында «Самұрық Innovation» компаниясын құру мүмкіндіктері қаралды. Жұмыс бабындағы іс-сапар барысында «Самұрық-Қазына» компаниялары тобының қызметі таныстырылып, «Астана ЭКСПО-2017» Халықаралық мамандандырылған көрмесі, Астанада құрылысы басталған «Жасыл орам» және күн панельдері өндірілетін «Kaz PV» жобасы туралы мағлұмат берілді.

«EXPO 2017» көрмесіне әзірлік аясында іске асырылуы мүмкін бірлескен жобаларды талқылау үшін Стэнфорд университеті, SolarCity және Motors компанияларының өкілдері ағымдағы жылдың мамыр айында өтетін Астана экономикалық форумына шақырылды. Ұсынысты Силикон жазығының іскер және ғылыми ортасы ерекше ықыласпен қабыл алды.

Жоғарыда аталған қос компанияның директорлар кеңесінің мүшесі және Бас директоры Илон Маскпен келелі кездесуде әріптестікті көрмеге қатысу аясынан ауқымды қарқында ілгерілету жолдары сараланды.

Анықтама: Илон Рив Маск (eng. Elon Reeve Musk) — канада-америкалық инженер, кәсіпкер, өнертапқыш әрі инвестор; миллиардер. SpaceX компаниясының негізін қалаушы, иесі әрі Бас директоры және Бас инженері; Tesla Motors компаниясының бас дизайнері, Бас директоры және директорлар кеңесінің төрағасы. SolarCity компаниясы директорлары кеңесінің құрамына кіреді. Ақпараттық технологиялар, зымырын және машина жасау саласында толағай табыстарға қол жеткізген белді кәсіпкер.

Tesla Motors компаниясына әлемге әйгілі электротехник және физик Никола Тесланың аты берілген. Бұл кәсіпорын алғашқы толық электрлі спорттық автокөлік құрастырған соң, дүние жүзіне танымал болды. Компанияның екінші өнімі S модельді люкс санатындағы толық электрлі седан. Таяуда Х модельіндегі жол талғамайтын электр көліктері құрастылмақ.

SolarCity – АҚШ-тың энергетика саласында қызмет ететін ірі компания. 2006 жылы құрылған кәсіпорын жекелеген тұрғындарды, кәсіпорындарды, тіпті мемлекеттік мекемелерді күн қуатымен қамтамасыз етіп отыр. Компания алдымен энергетикалық тиімділік аудитін жүргізіп, дайын әзірлемелер ұсынады. Жобаны қаржыландырып, күн қуаты жүйесін орнатып береді. Сондай-ақ, электрлі көліктерге қуат беретін станциялардың құрылысын жүргізіп, модернизациялаумен айналысады.