"Самұрық-Қазына" Қоры көміртекті пайдалану деңгейін төмендету бағдарламасын іске асыруды қолға алды. Портфельдік компаниялармен бірқатар кеңестер өткізіліп, декарбонизация бойынша көрсеткіштер мен стратегиялық мақсаттар айқындалды.

Қор басшылығы қоршаған ортаға айтарлықтай әсер ететін "ҚазМұнайГаз" ҰК", "Самұрық-Энерго", "ҚазТрансГаз", "Қазатомөнеркәсіп" ҰАК", "Бірлескен химиялық компания", "Тау-Кен Самұрық", "Қазпошта", "Қазақтелеком" мен "Эйр Астана" сияқты компанияларының энергоауысу жоспарларымен танысты.

Күн тәртібіндегі бастамалар ең алдымен көмір қуатын алмастыруға, газ және гидроэнергетиканы дамытуға, баламалы энергия көздеріне негізделген жаңа қуат өндіру нысандарын іске қосуға, жеке пайдалану үшін қайта жаңғыратын энергия көздерінің құрылысына, энерготиімділікке, қуат жинақтауға, көміртекті аулап, сақтау технологияларын енгізуге, сутекті энергетиканы дамытуға және жасылдандыру шараларын іске асыруға бағытталған. Климаттық жобаларды қаржыландыру мақсатында "жасыл облигациялар" тәрізді қосымша қаржы құралдары қарастырылып жатыр. "Самұрық-Қазына" АҚ басшылығы тұрақты дамуды басты басымдықтардың бірі ретінде айқындаған. Компаниялардың қызметінде көміртекті қалдықтарын азайту активтердің ұзақмерзімді құндылығын арттыра түсіп, ірі инфрақұрылымдық жобаларды іске асыру кезінде инвестициялық тартымдылығын ұлғайтады.

"Самұрық-Қазынаның" басқарма Төрағасы Алмасадам Сәтқалиев атап өткеніндей, экологиялық жауапкершілік мәдениетін қалыптастыруға, цифрлық шешімдерді енгізуге және қабылданып жатқан шаралардың экономикаға жалпы әсерін бағалауға бағытталған кешенді шараларды қабылдау қажет.

Кеңестер барысында портфельдік компанияларға көміртекті пайдалану деңгейін төмендетудің нақтыланған шаралар жоспарын және тиісті жобаларды әзірлеу тапсырылды. Іске асқан жұмыстардың нәтижесі Қор тобында көміртекті азайтудың әлеуетін дұрыс бағалап, болашақта көміртекті бейтараптыққа қол жеткізуге мүмкіндік береді.

Экономикада көміртекті пайдалану деңгейін төмендету - мемлекеттер мен корпорациялардың жаһандық күн тәртібіндегі өзекті мәселелердің бірі. Қазақстан Республикасы 2015 жылғы Париж келісімі аясында парникті газ шығару деңгейін 2030 жылға дейін 1990 жылдың деңгейінен 15%-ға азайту міндеттемесін алған. Оған қоса, мемлекет басшысы Касым-Жомарт Тоқаев 2060 жылға дейін көміртекті бейтараптыққа жету мақсатын қойды.