«Самұрық-Қазына» АҚ Басқарма төрағасы Нұрлан Жақыпов Abu Dhabi Ports (ADPG) тобының төрағасы Мохамед Джума Аль-Шамисимен кездесу өткізді.

Тараптар Қордың портфельдік компанияларымен жобаны жүзеге асырудың ағымдағы жұмысын талқылады.

«ҚазМұнайГаз» АҚ мен ADPG-нің теңіз және жағалаудағы жүк тасымалы, танкер және сауда флотын дамыту саласындағы стратегиялық әріптестігі шеңберінде Каспий өңірінде бірлескен кәсіпорын құрылды. Ақтау-Махачкала бағытында 2 мұнай танкері сәтті жүріп жатыр, алдағы уақытта Ақтау-Баку бағытында мұнай тасымалдау жоспарлануда.

Ашық теңіздерде бірлескен танкерлер пулын құру бойынша жұмыстар жүргізілуде. Бүгінгі таңда 4 Aframax танкерінен тұрады.

Сондай-ақ, Қазақстанда кеме жөндеу және кеме жасау кәсіпорнын құру мүмкіндігі қарастырылуда.

«Қазақстан Темір Жолы» ҰК» АҚ желісі бойынша бірлескен кәсіпорын құру мәселелері пысықталуда. Тиісті келісім-шартқа 2023 жылдың желтоқсанында SOR28 Дүниежүзілік Климаттық конференциясында қол қойылды.

Бірлескен қызметтің негізгі бағыттары: баламалы маршруттар бойынша жүктерді тасымалдауды ұйымдастыру, терминалдарды салуға инвестициялар, цифрлық шешімдерді енгізу, теңіз кемелерімен бірлесіп жұмыс істеу болып айқындалды.

Анықтама: Abu Dhabi Ports 2006 жылы құрылды, содан кейін 2021 жылы бес бөлімшені біріктіретін топқа айналды - цифрлық технологиялар, экономикалық қалалар және еркін аймақтар, логистика, теңіз тасымалы және порттар.