2015 жылғы 23 маусымда, Астанада  «Самұрық-Қазына» АҚ жанындағы сараптамалық-консультативтік кеңестің отырысы өтті. Қордың адам ресурстарын басқару жөніндегі Бас директоры Дэниел Крюсберг депутаттар алдында Қор HR трансформациясының басты бағыттарын таныстырды. Корпоративтік мәдениет, жетекшілік пен басқару стилін өзгерту, қызметкерлердің мүмкіндіктерін ашу жайы сөз болды.

Адам ресурстарын басқару жөніндегі Бас директор Қордың HR-қызметі компаниядағы лауазымдарды грейдирлеу жобасын қолға алғанын жеткізді.

«Жаңалық, нақты міндеттерді шешу айырмасына қарамастан компаниялардағы директорлардың жалақысы біркелкі болып келеді. Меритократияда мұндай болмауы тиіс. Біз әкімшілер мен қызметкерлерді ынталандыруды қолға алдық. Осы ретте Қазақстандағы, ТМД мен әлемдегі нарықты өзара салыстыруды мақсат етеміз. Бұл таланттарды іріктеу платформасын жасауға мүмкіндік береді», - дейді Дэниел Крюсберг.

Сонымен қатар, Қор жаңа толқын жетекшілердің тобын жасақтауды қолға алады.   Бұл үшін HR-қызмет арнайы бағдарлама да жасады. Бұған сәйкес белсенді мамандарды басымдығы жоғары жобаларға, жауапты қызметтерге тағайындау қарастырылған.

Д.Крюсберг «Самұрық-Қазына» АҚ қызметкерлерін жалдау үдерісінің жетілдіріліп жатқанын да айтты.

«Біз алдымызға жаңа мақсат-міндеттер қойып отырмыз. Осы орайда мына мәліметтерді келтіргім келеді. 2014 жылы жалданған қызметкерлердің 85 %-ы ағылшын тілін еркін меңгерген. 2012 жылы бұл көрсеткіш 30% ғана болатын. 2014 жылы жалданған қызметкерлердің 90%-ы қазақ тілінде еркін сөйлейді. 2012 жылы 50% ғана еді. 2014 жылы жұмысқа қабылданған үміткерлердің 70%-ының шетелдік дипломы бар. 2012 жылы 30% болатын. 2014 жылы мамандардың 60%-ы бізге халықаралық компаниялардан, соның ішінде 40%-ы «үлкен төрттіктен» келді. 2012 жылы бұл көрсеткіш, тиісінше 20% және 10% болатын. Әрине, бәрі ойдағыдай, керемет деп айтуға келмес, бірақ біз қарапайым халықаралық стандарттарды басшылыққа ала отырып, дамып, жетіліп келеміз», - деді Дэниел Крюсберг.

Депутаттар HR трансформациясы аясындағы жұмыстарға жоғары баға берді.

«Қордың өз қызметкерлері арасында үлкен жұмыстар атқарып жатқанын көріп отырмыз. Компаниялардың меритократия жолына түскені құптарлық. Қызметкерлерді үздіксіз оқыту мен таланттарды іріктеу қолға алынған. Бұл өте маңызды. Белсенді, қуатты адам капиталы болмай трансформация бағдарламасындағы мақсаттарға жету мүмкін емес», - деп атап өтті сенатор Серік Нөгербеков.

«Самұрық-Қазына» АҚ бизнесті трансформациялау бағдарламасымен танысқан депутаттар Қорға мемлекеттік-жеке әріптестікті дамытуға көңіл бөлу қажеттігін де айтты. Бұл, өз кезегінде, Мемлекет басшысы бастамаларының орындалуына және ұлттық экономиканың дамуына Қор компаниялар тобының қосқан үлесі болмақ.