11 желтоқсан 2017 ж.– Лондонда «Самұрық-Қазына» АҚ Ұлыбритания халықаралық сауда министрлігімен бірлесе ұйымдастырған Қазақстан-Британ іскерлік кеңесінің екінші отырысы өтті.

Аталған іс-шараның негізгі мақсаты – халықаралық қауымдастыққа ұлттық компаниялардағы жағымды өзгерістердің барысы мен қарқыны жайлы баяндау, сонымен қатар британдық компанияларды Қазақстанның инвестициялық мүмкіндіктерімен таныстыру.

Жиынға қатысушылар «Самұрық-Қазына» АҚ ірі қоржындық компаниялары қызметінің негізгі бағыттарымен жан-жақты танысты. «Қазақтелеком» АҚ, «Қазпошта» АҚ, «Қазақстан темір жолы»ҰК» АҚ, «Қазатомөнеркәсіп» ҰАК» АҚ, «Эйр Астана» АҚ басшылары компаниялардың өңірлік және жаһандық деңгейлерде бәсекелестік артықшылықтары, цифрландыру бағытындағы жобалар жайлы баяндап, бизнесті дамытудың алдағы жоспарларын таныстырды.

«Бүгінгі таңда Қазақстанда Fortune 500 тізіміне кіретін шамамен 270 компания жұмыс істейді. Олардың көбімен, оның ішінде GE, Amazon, Microsoft, IBM және басқаларымен «Самұрық-Қазына» байланыс көпірін орнатқан. Бүгінгі іс-шара және өткізілетін бірқатар екіжақты кездесулер қос мемлекеттің экономикалық қарым-қатынасын нығайтуға және Қазақстанға британдық инвестицияларды көбірек тартуға бағытталған», - деп атап өтті пленарлық сессияның жұмысын ашқан «Самұрық-Қазына» АҚ стратегия және активтер қоржынын басқару жөніндегі басқарушы директоры Балжит Гревал Каур. «Бүгінде қаржылық және заңгерлік қызмет көрсететін британдық компаниялар АХҚО қалыптастыру жолында күшейтілген түрде жұмыс істеуде. Бұл жұмыс жалғасады. Еуропаның қаржы орталығына айналған Лондон сіздермен амбициялық және қазіргі таңда сәтті орындалып жатқан жекешелендіру бағдарламасын жүзеге асыруда ынтымақтасуға асқан қызығушылық танытады», - деп атап өтті Қазақстандағы Ұлыбритания Премьер-Министрінің сауда өкілі баронесса Эмма Николсон Винтерборнская.

«Экономикалық сипаттағы бұл іс-шара біздің елдеріміздің арасындағы қарым-қатынас жоғары деңгейде екендігін паш етеді. Қазақстан-Британия арасындағы дипломатиялық қарым-қатынастың орнағанына 25 жыл толғанын атап өткен жылдың соңында қос мемлекеттің экономикалық ынтымақтастығына арналған іс-шараны өткізіп жатқанымыз қуантады», - деп атап өтті ҚР Ұлыбританиядағы төтенше және өкілетті елшісі Ерлан Ыдырысов.

Іс-шараға Лондондағы іскерлік қауымдастықтың 120-дан астам өкілі қатысты. Күннің екінші жартысында үкіметаралық комиссияның отырысы өтті. Оның барысында пайдалы қазбаларды өндіру, энергетика, қаржылық қызметтер және т.б. салалардағы екіжақты ынтымақтастықтың тәжірибелік аспектілері талқыға салынды.