Президент Қасым-Жомарт Тоқаев еліміздегі шағын моноқалаларды дамыту жөніндегі кеңесті бүгін Павлодар облысындағы Екібастұз қаласында өткізді. 

Бұл қаладағы ірі жүйе құраушы үш алпауыт компания «Самұрық-Қазына» холдингінің құрылымына кіреді. Он мыңға жуық қала тұрғыны Нұржанов атындағы Екібастұз ГРЭС-1, Екібастұз ГРЭС-2 және «Богатырь Көмір» компанияларында еңбек етеді. 

Жалпы, Қазақстанның 27 моноқаласында Қор тобына кіретін 46 компания мен олардың филиалдары жұмыс істейді. Оларда қызмет ететін халық саны 33 мыңнан асып жығылады. Қор тобына кіретін 5 ірі ккомпания үш моноқала – Екібастұз, Жаңаөзен мен Ақсайда, жүйе құраушы кәсіпорын болып саналады. Бұл туралы кеңесте «Самұрық-Қазына» АҚ басқарма Төрағасы Алмасадам Сәтқалиев мәлімдеді.   

Өз баяндамасында ол жергілікті тауар өндірушілерді қолдау аясында биылғы жылдың басынан бері Қор моноқалалаларда шоғырланған 739 жеткізіп берушіге тапсырыс бергенін хабарлады. Келісім-шарттардың жалпы құны 395 млрд теңгеден асып жығылады. 

Соның ішінде Екібастұз қаласында 183 жеткізіп берушіге 60 млрд теңгеге бағаланатын тапсырыс орналастырылды.  Сонымен қатар «Самұрық-Қазына» басшысы 2016-шы жылдан бері Қор тарапынан Қазақстанның 22 моноқаласында жалпы құны 2,5 млрд теңгеден асатын 76 әлеуметтік жоба жүзеге асырылғанын тілге тиек етті.