«Самұрық-Қазына» АҚ Н.Д. Батпенов атындағы Ұлттық ғылыми травматология және ортопедия орталығына жалпы құны 393,1 млн теңге болатын жаңа заманауи жабдықтарды табыстады.

Сатып алынған техника жарақаттар мен сүйек-бұлшықет жүйесі ауруларының салдарынан болатын асқынуларды азайтуға көмектеседі.

Салтанатты рәсімге Қор басшысы Нұрлан Жақыпов пен Денсаулық сақтау вице-министрі Ержан Нұрлыбаев қатысты.

«Жылына тірек-қимыл аппаратының жарақаттары мен ауруларынан зардап шегетін 8 мың азаматымыз енді едәуір сапалы, жоғары деңгейдегі медициналық көмек алады. Жаңа жабдық медициналық орталық жұмысының тиімділігін арттыруға сеп болады деп сенемін», – деді Нұрлан Жақыпов құттықтау сөзінде.

Сондай-ақ, ол корпоративтік әлеуметтік жауапкершілік аясында Қор адамдардың денсаулығын жақсартуға және өмір сүру сапасын арттыруға ерекше көңіл бөлетінін еске салды.

«Самұрық-Қазына» АҚ Батпенов атындағы ҰҒТОО-на жаңа инновациялық жабдықтарды табыстады. Олар:

• Cobas автоматты биохимиялық талдағышы – биохимиялық талдауларды жедел жасап, патологияның бар-жоғын дәл анықтайды.  
  
  
• Richard Wolf лапароскопиялық хирургия құралдары – сколиоз, жарық, сыну сияқты жарақаттарға үлкен тілік жасамай және сау тіндерге зиян келтірмей ота жасауға мүмкіндік береді.  
  
  
• Mast quadrant ретракторлық жүйесі – омыртқаның әртүрлі бөліктеріне күрделі хирургиялық ота жасау үшін оңтайлы қолжетімділікті қамтамасыз етеді.  
  
  
• Sonopet IQ ультрадыбыстық аспиратор жүйесі – бірқатар күрделі операцияларды орындауға, соның ішінде сүйек және талшықты тіндерге ота жасауға мүмкіндік береді.
    
• Tivato 700 мультидисциплинарлық операциялық микроскопы – жарақаттар кезінде аяқ-қолдарды сақтау, жұмсақ тіндердің терең ақауларын емдеу үшін тамырлар мен жүйкеге микроскопиялық тігістер тігуге мүмкіндік береді.  
  
  
• Humeca сымсыз дерматомы – күйік шалған кезде теріні трансплантациялауда таптырмайтын құрал.  
  
  
• Аккумуляторлық күш жабдықтарының жиынтығы (ара, бұрғы) – сүйекке жасалатын барлық операциялар, соның ішінде эндопротездеу, остеосинтез, остеотомия және басқа да көптеген операциялар үшін қажет.

Алынған техниканың жалпы құны шамамен 400 млн теңге.