«Самұрық-Қазына» тобы отандық тауар өндірушілермен жұмысты жандандырды. Бұл ұлттық өнеркәсіптің дамуына және өндірістегі жергілікті үлесті арттыруға ықпал етуде.

Биыл бес ай ішіндегі сатып алу көлемі бойынша алдыңғы орында:

• ҚТЖ — 123,2 млрд теңге (өсім 15%, 2024 жылы «Ақтөбе рельс-арқалық зауытымен» 325 млрд теңгеге жасалған ірі келісімді қоспағанда),

• Қазатомөнеркәсіп — 122,3 млрд теңге (80%-ға өсім),

• ҚазМұнайГаз — 120,1 млрд теңге (43%-ға өсім).

«2025 жылдың алғашқы бес айында отандық тауар өндірушілермен жасалған шарттардың көлемі 433 млрд теңге болды», — деді Қор басшысы Нұрлан Жақыпов Үкімет отырысында.

Ал офтейк-келісімшарттар көлемі бойынша ҚТЖ, ҚазМұнайГаз және KEGOC көш бастап тұр. Олардың шарттарының жалпы сомасы — 110,3 млрд теңге.

Отандық өндірісті қолдауға бағытталған Қордың сатып алу жүйесі Қазақстан экономикасының тұрақты дамуына және оның бәсекеге қабілеттілігін арттыруға ықпал етеді.