Астанада «Туған елге саяхат» лагерінің IX маусымының басталуына орай «Нұрлы жол» вокзалынан арнайы пойыз жолға шықты.

12-16 жас аралығындағы балалар бес қаланы - Астана, Екібастұз, Балқаш, Түркістан және Алматыны аралап шығады. Лагерь бағдарламасы бойынша олар ел тарихы және мәдениетімен танысып, кәсіби бағдарлау жұмыстарынан өтеді. Сондай-ақ, қатысушылар ҚТЖ-ның екі зауытына, МАЭС-ке және Air Astana базасына барады.

Сапар соңында әр балаға оның қызығушылығы, қабілеті мен әлеуетіне қарай мамандар тарапынан жеке кәсіби ұсыныстар беріледі.

«Бұл бастама – еліміздің кадрлық резервін қалыптастыруға қосқан үлесіміз. Болашақта бұл балалар біздің компанияларда тәжірибеден өтіп, білікті маман атана алады», – деді «Самұрық-Қазына» басшысы Нұрлан Жақыпов.

Барлығы екі ағымда арнайы іріктеуден өткен 400 бала қатысады. Жобаны «Самұрық-Қазына» компаниялары тобының бірыңғай қайырымдылық операторы – «Samruk-Kazyna Trust» қоры ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссиямен бірлесіп жүзеге асырып жатыр.