Қазақстан Республикасының Премьер-Министрі Олжас Бектенов «Самұрық-Қазына» ұлттық әл-ауқат қоры» АҚ Директорлар кеңесінің отырысын өткізді. Отырыс барысында Қор қызметінің биылғы жеті айдың негізгі аспектілері, сондай-ақ басым инвестициялық жобаларды іске асыру мәселелері қаралды.

Қордың Басқарма төрағасы Нұрлан Жақыпов есепті кезеңдегі негізгі оқиғаларды, өндірістік және қаржылық көрсеткіштерді қамтитын есепті ұсынды.

Жедел деректерге сәйкес Қордың 2025 жылғы 7 айдағы кірісі мен EBITDA бойынша нақты мәндері жоспарланғаннан тиісінше 6% және 15%-ға асып түсті. Асыра орындау шикі мұнай мен мұнай өнімдерін өткізу көлемінің ұлғаюына, мұнай мен газ конденсатын өндіруге, сондай-ақ газды экспортқа өткізу көлемінің ұлғаюына байланысты.

Сондай-ақ Директорлар кеңесінің мүшелеріне ҒЗТКЖ-ны дамыту және Қор тобының компанияларында жасанды интеллектті енгізу туралы ақпарат ұсынылды.   

Директорлар кеңесі экономиканың басым салаларын қамтитын 52 ірі инвестициялық жобаның іске асырылу барысы туралы ақпаратпен танысты. Жобаларды іске асыру Мемлекет басшысының тапсырмалары, мемлекеттік және үкіметтік бағдарламалар аясында жүргізіледі.

Есепті кезеңде «Самұрық-Қазына» АҚ энергетика, көлік-логистика және мұнай-газ инфрақұрылымында айтарлықтай нәтижелерге қол жеткізді.

Энергетика саласында Көкшетау ЖЭО құрылысы, сондай-ақ № 3 энергия блогын орната отырып, Екібастұз МАЭС-2-ні кеңейту бойынша құрылыс-монтаждау жұмыстары басталды. Сондай-ақ Siemens бірінші газ турбинасын орнату аяқталған ЖЭО-2-ні жаңғырту жұмыстары жалғасуда. Мұнай-газ секторында газ бөлу кешенін салу келісімшартына қол қойылды, сондай-ақ Кендірлі кентінде теңіз суын тұщыландыру жөніндегі алғашқы өндірістік желі іске қосылды.

Көліктік-логистикалық инфрақұрылымда да елеулі өзгерістер тіркелді: Бақты-Аягөз темір жол желісінің құрылысы жүргізілуде, Каспий теңізінің түбінде талшықты-оптикалық байланыс желісін төсеу үшін теңіз ізденістері басталды.

Осы жылы Caspi Bitum зауытының қуатын кеңейту және ZHETYSU контейнерлік терминалының құрылысы сияқты жобалар аяқталды. Биыл аяқталуы жоспарланған бірқатар жобаларды іске асыру жалғасуда: Достық – Мойынты теміржол желісінің екінші жолдары бойынша пойыздардың қозғалысы ішінара іске қосылды, Ақтау портында контейнерлік хаб іске қосылды, Талдықорған – Үшарал магистральдық газ құбырының желілік бөлігі аяқталды, Алматыны айналып өтетін айналма теміржол желісінің құрылысы жалғасуда.    

Сонымен қатар қаржыландыру көздерін әртараптандыру аясында Қордың Директорлар кеңесі ҚХР нарығында панда-облигациялардың дебюттік шығарылымы арқылы сыртқы қарыз алуды мақұлдады.

Осы бастамаларды іске асыру Қордың инфрақұрылымды дамытуға, тұрақты экономикалық өсуді қамтамасыз етуге және халықтың өмір сүру сапасын арттыруға жүйелі көзқарасын көрсетеді.

Фото көзі: Қазақстан Республикасы Үкіметінің Баспасөз қызметі