Сарапшылар мен қоғам өкілдерінің қатысуымен ашық диалог форматында өткен «Самұрық-Қазына» АҚ Қоғамдық кеңесінің отырысында компаниялар тобының 2016–2025 жылдардағы корпоративтік әлеуметтік жауапкершілік бағытындағы нәтижелері қорытындыланды.

Осы кезеңде 124,1 млрд теңгеге 434 әлеуметтік жоба іске асырылған. Еліміздің 17 өңірінде және республикалық маңызы бар 3 қалада 274 әлеуметтік нысан — оңалту орталықтары, инклюзия кабинеттері, спорт кешендері, креативті хабтар, музейлер мен кітапханалар ашылды.

• 11,5 млн-нан астам адамға, оның ішінде 3,2 млн балаға көмек көрсетілді.
• Әлеуметтік сала мамандарына (педагог, дәрігер, психолог, жаттықтырушы) арналған 2 701 жұмыс орны құрылды.
• Мүгедектігі бар 15 мыңнан астам баланың өмір сүру сапасы жақсарды.

2025 жылдың өзінде 13,2 млрд теңгеге 39 жоба жүзеге асырылып, шамамен 1 млн отандасымызға қолдау көрсетілді.

Samruk-Kazyna Trust ұйымы қордың бірыңғай қайырымдылық операторы қызметін атқарады. Дәл осы ұйымда «Ainala» оңалту орталықтарынан бастап «Шексіз мүмкіндіктер» бейімдеуші лагеріне дейін, сондай-ақ балалардың білім алуына және мамандық таңдауына көмектесетін «Samruk Umiti», «Жарқын болашақ» жобаларына дейінгі жүйелі шешімдер қалыптасады.