Қор жасанды интеллектіні қолданатын 62 жобаны іске асырып жатыр. 2030 жылға дейін олардың экономикалық тиімділігі 711 млрд теңгеге жетеді деп болжануда. 2026 жылы портфельдік компанияларға жасанды интеллектіні енгізу есебінен EBITDA көрсеткішін 5%-ға арттыру жөнінде KPI белгіленді.

Қазірдің өзінде жасанды интеллект пилоттық режимде қолданылып жатқан негізгі салалар:

• Тау-кен секторында «Тау-Кен Самұрық» компаниясы кернді интеллектуалды талдау жүйесін қолданады. Бұл жүйе үлгілердің фотосуреттері арқылы минералданудың бар-жоғын автоматты түрде анықтайды.

Сонымен қатар, «Samruk-Kazyna Ondeu» компаниясы Степногорск қаласындағы күкірт қышқылы зауытында цифрлық егіз технологиясын енгізуде. Ол жабдықтың жұмысын болжауға мүмкіндік береді әрі шығындарды 5–8%-ға төмендетуге, жабдықтың тұралап қалу уақытын 5%-ға қысқартуға және апаттар санын 2–3%-ға азайтуға ықпал етеді.

• Мұнай-газ саласында «ҚазМұнайГаз» ABAI жобасын енгізуде. Жасанды интеллект қолданылатын қабатқа су айдау процесін басқару модулі 2025 жылы қосымша 12 мың тонна мұнай өндіруге мүмкіндік береді. Жобаның экономикалық тиімділігі - 1,5 млрд теңге.

Аталған жобалар бойынша барлық жұмыс Алматы қаласында орналасқан Al FARABIUM жеке суперкомпьютерінде жабық контурда жүргізіледі.

Фото: Ақорда