Бұл туралы «Самұрық-Қазына» АҚ басқарма төрағасы Нұрлан Жақыпов Астанада өткен «Еуразиядағы тұрақты даму» атты жоғары деңгейдегі екінші халықаралық конференцияда мәлімдеді.

Ол тұрақты даму қағидалары «Самұрық-Қазына» стратегиясының ажырамас бөлігі екенін атап өтті.

Қор активтері 88 млрд АҚШ долларынан асады, ал компаниялар тобында 250 мыңнан астам адам еңбек етеді. Қор энергетика, көлік, мұнай-газ саласы және телекоммуникация бағыттарында жалпы құны 100 млрд АҚШ долларынан асатын 120-дан астам жобаны жүзеге асырып жатыр.

Негізгі бағыттардың қатарында Транскаспий халықаралық көлік бағытын дамыту, қуаты 6 ГВт-тан асатын жасыл энергетика жобалары, сондай-ақ AI-инфрақұрылымды қалыптастыру жобалары бар. Сонымен қатар, халықаралық цифрлық дәліздерді дамытуға және Еуразия өңірлері арасындағы трансшекаралық деректер алмасуды күшейтуге бағытталған бастамалар іске асырылып жатыр.

Адам капиталын дамыту – басым бағыттардың бірі. Қордың әлеуметтік бағдарламалары аясында жыл сайын бір миллионнан астам адам көмекпен қамтылады.

«Бүгінде тұрақты даму – жай ғана халықаралық күн тәртібі емес. Бұл – экономика тұрақтылығының, мемлекеттердің бәсекеге қабілеттілігінің және болашақ ұрпақтың өмір сапасының мәселесі», – деді Нұрлан Жақыпов.