Тараптар «Самұрық-Қазына» мен CITIC Group арасындағы стратегиялық серіктестікті әрі қарай дамыту мәселелерін талқылады. Негізгі назар мұнай-газ химиясы саласындағы ынтымақтастыққа, қаражат тартуға және капитал нарығындағы жобаларды дамытуға аударылды.

Тараптар бірлескен жобалардың (Caspi Bitum зауытын жаңғырту, «Қаражанбасмұнай») сәтті іске асырылып жатқанын атап өтті. Серіктестіктің маңызды бағыттарының бірі – этан-пропан құбырын салу. Құбыр Теңіз кен орнынан Қазақстандағы полиэтилен және полипропилен өндіретін зауыттарға этан мен пропанды қауіпсіз әрі сенімді тасымалдауды қамтамасыз етеді.

Сондай-ақ, Қазақстан-Қытай Іскерлік кеңесі алаңында бастау алған бастамаларды жүзеге асыру мәселелері қаралды. «Самұрық-Қазына» мен CITIC Group аталған кеңестің тең төрағалары қызметін атқарады. Іскерлік кеңестің соңғы екі отырысының қорытындысы бойынша жалпы сомасы шамамен 20 млрд долларды құрайтын 110-нан астам коммерциялық құжатқа қол қойылған еді.

CITIC Group – қаржы-банк қызметі, сақтандыру, өнеркәсіп пен құрылысқа инвестиция салу, энергетика, көлік және телекоммуникация салаларында жұмыс істейтін мемлекеттік ірі конгломерат.