«Самұрық-Қазына» АҚ қоржын компаниялары стандарттарды – компаниялардың корпоративтік міндеттерін ұйымдастыру, соның ішінде бухгалтерлік және салықтық есеп, қазынашылық, адам ресурстарын басқару, ақпараттық қауіпсіздік, оперативті жоспарлау, тәуекелдерді басқару және т.б. бойынша әлемдік озық тәжірибедегі үлгілерді енгізуді бастады. Стандарттады енгізу компаниялардың оперативті қызмет тиімділігін барынша арттырып, тікелей стратегиялық мақсаттармен айналысуға мүмкіндік береді.

«Біз алдымен жаңа операциялық үлгілерді жасап, ұлттық компаниялардағы ұйымдастыру құрылымдарының жұмысын жеңілдеттік, бұдан кейін бизнес-үдерістерді стандарттарға сәйкестендірдік. Осы өткен кезеңде 30 мыңға жуық үдерістер қайта қаралды, компанияларды басқару деңгейі бұрынғы 9-дан 4-5 сатыға дейін қысқарды. Осының арқасында қызметтердің қосарлануынан, басы артық есеп пен ескірген регламенттерден арылдық. Келесі маңызды кезең – автоматтандыру, кез келген коммерциялық бастамалардың табысы осы үрдістерді дұрыс іске асыруға байланысты», - деді Адамас Илькявичюс, «Самұрық-Қазына» АҚ трансформация мен арнайы жобалар бойынша басқарушы директоры.

Стандартты үдерістерді енгізуді бастаған алғашқы компанияның бірі – Қазпошта, барлық өңірде бөлімшелері бар (3 мың бөлімшеге жуық) әрі тұрғындармен тікелей жұмыс істейді. Компанияны автоматтандыру HR-үдерістерден басталды, өйткені, компанияның 60% шығыны қызметкерлерімен байланысты. Осы орайда адам ресурстарын тиімді басқару Қазпоштаның негізгі басымдықтарының бірі болып табылады.

Компания лауазымдық тізбені сәйкестендіріп, оларды 178-ден 42-ге дейін қысқартты. 23 мың қызметкер туралы ақпарат жаңа автоматтандырылған жүйеге көшірілді. Осы жылдың аяғына дейін жалақыны есептеу, қызметкерлерді іздеу, табу,оқыту, бағалау бойынша HR-үлгілер енгізіледі.

«Қазпоштаның HR-қызметін автоматтандыру қызметкерлердің орталықтандырылған есебін жүргізіп, штаттық кесте мен әр қызметкердің міндет бөлісіне қатысты оперативті мәлімет алуға, сол арқылы сапалы басқаруға мүмкіндік туғызады», - деді Бауыржан Қайырбеков, «Қазпошта» АҚ бизнес-шешімдерді интеграциялау бағыты бойынша жетекшісі. HR-міндеттерді автоматтандырғаннан кейін босайтын еңбек ресурстарын басшылық коммерциялық тұрғыда басым болып табылатын маркетинг және сату саласына бағыттауды көздеп отыр.

«Бұдан әрі Қазпоштаның барлық корпоративтік қызметтері сәйкестендіріледі. Қызметкер Астанада немесе Оңтүстік Қазақстан облысы, Абай ауданында тұрып жатса да, барлығы біркелкі үдеріспен, регламентпен жұмыс істейтін болады», - деп атап өтті Б.Қайырбеков.

Анықтама: Өткен жылдың қараша айынан бастап «Самұрық-Қазына» АҚ қоржын компаниялары трансформация жобаларын іске асырып жатыр. Мысалы, «Қазатомөнеркәсіп» қоржынында инвестиция мен сатып алуды басқару, коммерциялық қызмет пен маркетингті күшейту, ұйымдастыру құрылымын өзгерту бойынша 26 жоба бар, «Қазақстан темір жолы» мен «Қазпоштада» 6 және 32 жоба бар. Мұндай жобалар «Қазмұнайгаз»,«Самұрық-Энерго» және «KEGOC» компанияларында да қарастырылған.