Олардың қатарына «Самұрық-Қазына» АҚ-ның 38 компаниясы кіреді.

Жақын арада Қазақстанда жекешелендірілетін компаниялардың қатары қосымша 60 нысанмен толығатын болады. Бұл жөнінде ҚР Президентi жанындағы Орталық коммуникациялар қызметiнде Үкімет отырысының қорытындысы бойынша өткен баспасөз мәслихатында ҚР Премьер-Министрінің бірінші орынбасары Бақытжан Сағынтаев мәлімдеді.

Аталған компаниялардың 38-і «Самұрық-Қазына» акционерлік қоғамына, төрт-төртен «Бәйтерек» және «Қазагро» ұлттық компанияларына тиесілі болса, қалған 14-і республика меншігіндегі нысандар болып табылады.




Вице-премьер атап өткендей, стратегиялық инвесторларға жүзеге асырылатын барынша ірі активтердің акциялары қор нарығына орналастыру арқылы сатылатын болады. Соның ішінде 2018 жылдың 1-ші қаңтарына дейін олар «Астана» халықаралық қаржы орталығының алаңына шығады. Жеке инвестор қатысып отырған өзге компаниялардың сатылымы бойынша аукцион ұйымдастырылады.

-Мемлекеттің қатысу үлесі 100%-ды құрайтын компанияларда акциялардың бақылау және бұғаттаушы пакеті сатуға қойылса, жеке инвесторлар қатысатын компанияларда олардың үлестері 50% плюс 1 акцияға дейін жеткізілетін болады, -деп түсіндірді Сағынтаев. 
 

Сонымен қатар, Бақытжан Сағынтаев жекешелендірудің басты мақсаты – 2020 жылға қарай жеке меншік үлесін ЭЫДҰ елдерінің деңгейіне немесе ІЖӨ-нің 15%-ына жеткізу екендігін еске салды.  

Дереккөз: dixinews.kz