Қазатомөнеркәсіп өз акцияларын халықаралық қор биржасында сәтті орналастырған алғашқы ұлттық компанияға айналды. Ұлттық компания құны 451 млн АҚШ долларын құрайтын өзінің 15% акциясын Лондон қор биржасында орналастырды. Сұраныс ұсыныстан 1,7 есе асып түсті.

Орналастырылған акциялардың/ҒДҚ көлемі – 38 903 491 дана немесе «Қазатомөнеркәсіп» ҰАК акцияларының 15%-ы. Қазақстандық инвесторлар орналастырылған құнды қағаздардың жалпы көлемінен 47,5%-ын сатып алды. Орналастырылған акциялардың көлемі  451 млн АҚШ долларына бағаланған.

«Әлемдік қор нарықтарында қазан айының басынан бері құбылу байқалғанымен, біз өзіміздің алға қойған міндетімізді орындадық және IPO-ға шықтық, себебі бұдан өсімнің ұзақмерзімді перспективасын көреміз. Қазатомөнеркәсіп – Лондон биржасында (LSE) да, АХҚО (AIX) да халықаралық ІРО шығып жатқан тұңғыш квазимемлекеттік компания. Жария компания мәртебесі Қазатомөнеркәсіпке инвесторлар үшін барынша жариялы және түсінікті болуына мүмкіндік береді», - деп атап өтті «Самұрық-Қазына» АҚ басқарма төрағасы Ахметжан Есімов «Самұрық-Қазына» басқармасы отырысында.

«Қазатомөнеркәсіп» ҰАК» АҚ-ның IPO – ҚР Үкіметімен 2016 жылы қабылданған мемлекеттік меншікті жекешелендіру бағдарламасының бірінші негізгі элементі. Бағдарлама Елбасы Нұрсұлтан Назарбаевтың ЭЫДҰ ұсыныстарына сәйкес мемлекеттің экономикадағы үлесін ЖІӨ-нің 15% дейін қысқарту бойынша белгілеген міндеті аясында жүзеге асырылуда.

ІРО-ға жалпы 49 шетелдік және 16 отандық заңды тұлға, сонымен бірге Қазақстан Республикасының 2700 азаматы қатысты.