"Самұрық-Қазына" АҚ Басқарма төрағасы Алмасадам Сәтқалиев Қор ұжымымен есептік кездесу өткізді. 200-ден астам қызметкер қатысқан шара бейнебайланыс режимінде өткізілді. Бүгінгі таңда, барлық санитарлық шектеулерді ескере отырып, жиналыс өткізудің осы сияқты оңтайлы форматы барлық басқару буындарын қамтып, қатардағы қызметкерлермен және шетелдегі филиал менеджерлерімен байланыс орнатуға мүмкіндік берді.

Алмасадам Сәтқалиев холдинг қызметінің негізгі басымдықтарын тілге тиек етіп, әрі қарай дамуының бағытын айқындап берді. Соның ішінде портфельдік компанияларды декарбонизациялау, корпоративтік мәдениетті нығайту, активтерді жекешелендіруге дайындау және т.б.

"Самұрық-Қазына" АҚ басшысы COVID-19 пандемиясының салдарынан жаһандық трендтер мен макроэкономикалық ортаның ықпалы өзгеріп, нәтижесінде Қордың даму Стратегиясы соған бейімделіп, жаңартылып отырғанына баса назар аударды.

Еліміздегі ең ірі холдинг үш басым бағытты көздеп отыр:
• Қазақстан экономикасына инвестиция құю
• стратегиялық және әлеуметтік маңызы зор жобаларды іске асыру
• өңірлерді қолдау.
Негізгі басымдық ретінде ел экономикасының тұрақты дамуы мен көміртекті бейтараптыққа қол жеткізу айқындалды.

Алмасадам Сәтқалиев Қор қызметкерлерінің барлығына жемісті еңбек етіп, дамуға үлес қосқаны үшін алғысын айтты. Сауалдарға жауап бере отыра, Қор басшысы ірі жобалар - магистральды мұнай құбырлары жүйесін дамыту, ұлттық электржелілерін жаңарту жобаларын іске асыру тарихы туралы және салалық мемлекеттік бағдарламаларды әзірлеу жұмыстары туралы баяндап берді.