Алматы облысына жұмыс сапары шеңберінде Қазақстан Республикасының Премьер-министрі Асқар Мамин көліктік-логистика инфрақұрылымы нысандарын аралап, "Қорғас - шығыс қақпасы" еркін экономикалық аймағы қызметімен танысты. 

Үкімет басшысына «KTZE-Khorgos Gateway» құрғақ портының мүмкіндіктері таныстырылды. Ол жүктерді сақтау, өңдеу және жөнелту қызметтерін көрсетеді. 2021 ж. 8 айында контейнер жөнелту көлемі былтырғымен салыстырғанда 25% артты. Порт қуаттылығы - жылына 540 мың жиырмафуттық контейнер. 

Премьер-министр сонымен қатар «KIF Warehouses» бонд қоймасы қызметінің нәтижелерімен де танысты. E-Commerce жаһандық нарығының қарқынды дамуы кезеңінде бұл қойманың артықшылы мол. Өткен тамыз айында "Қорғас - шығыс қақпасы" еркін экономикалық аймағы арқылы көлемі 400 келі пошта транзиті сынамалы түрде қабылданды. Жоба жүзеге асырылғаннан кейін халықаралық пошта жөнелтулерін Еуропа Одағы, Орталық Азия және ЕЭО елдеріне транзитті әуе тасымалы арқылы 2-3 күнге дейін, ал, автокөлікпен жеткізуді 7-12 күнге дейін қысқартуға мүмкіндік береді.   

Үкімет басшысына Алматы облысында теміржол инфрақұрылымын дамытуға бағытталған жұмыстар туралы баяндалды. Үкімет Қытайдан Қазақстанға қажетті жүктерді жеткізу механизмдерін жетілдірілмек. Бұл орайда "Самұрық-Қазына" АҚ еліміздің транзиттік әлеуетін кеңейту және дамыту бағытында тиісті шараларды қолға алмақ.