Мемлекет басшысының Иорданияға ресми сапары аясында «Самұрық-Қазына» қорының Басқарма төрағасы Нұрлан Жақыпов Иорданияның Инвестициялар министрі Мусанна Гараибехпен кездесті.

Тараптар екі ел арасындағы ынтымақтастықты кеңейтудің перспективалық бағыттарын талқылады.

Нұрлан Жақыпов «Самұрық-Қазына» тобының инвестициялық портфелі 100 млрд АҚШ долларынан астам сомаға 130 жобаны қамтитынын атап өтті.

Сонымен қатар, «Самұрық-Қазына» қорының Басқарма төрағасы Иорданияның JUMCO уран өндіруші компаниясының бас директоры Мұхаммад әл-Шаннахпен кездесті. Кездесу барысында тараптар атом өнеркәсібіндегі ықтимал ынтымақтастықты талқылады, сондай-ақ Қордың портфельдік компаниясы – «Қазатомөнеркәсіп» мен JUMCO компаниясы арасындағы Өзара түсіністік туралы меморандумға қол қойды.

Меморандум:

• Уран өндіру саласындағы жаңа технологияларды зерттеуді;
• Уранды өңдеуге және экспорттауға бірлесіп қатысу ықтималдығын болжайды.

Құжат Қазақстан мен Иордания арасындағы стратегиялық әріптестікті нығайтудағы маңызды қадам болды, деп атап өтті Нұрлан Жақыпов.

Сонымен қатар, Қазақстан мен Иордания президенттерінің қатысуымен «Самұрық-Қазына» мен Иорданияның Инвестициялар министрлігі арасында Ынтымақтастық туралы келісімге қол қойылды. Құжат инфрақұрылым, энергетика және тұрақты даму сияқты негізгі бағыттардағы ынтымақтастықты дамытуға бағытталған.