Қазақстан Республикасы Үкіметінің 2023 жылғы 17 наурыздағы № 230 қаулысымен Қордың 2023–2032 жылдарға арналған жаңартылған Даму жоспары бекітілді.

Мемлекет басшысының тапсырмасына сәйкес әзірленген «Самұрық-Қазына» АҚ-ның 2032 жылға дейінгі жаңартылған Даму жоспары ағымдағы және болашақ сын-қатерлерді табысты еңсеруге бағытталған жан-жақты ойластырылған стратегияны білдіреді. Сонымен қатар, Қордың Даму жоспары негізгі жалпыұлттық басымдықтарға сәйкес келеді және елдің ұзақ мерзімді даму бағытын айқындайтын ұлттық құжат болып табылатын «Қазақстан-2050» стратегиясын іске асыруға ықпал етеді.

Айта кету керек, Даму жоспары өткен жылдардағы ұқсас құжаттарға қатысты сабақтастықты сақтайды, олармен қайшы келмейді, бірақ жекелеген ережелерді толықтырады және нақтылайды.

Ел дамуының қазіргі әлеуметтік-экономикалық жағдайын және Қордың рөлін ескере отырып, бүгінгі таңда инвестицияларды Қазақстан экономикасын дамытуға бағыттаған жөн. Осыған байланысты, алдағы 5 жылда Қорды басқару моделі елдің әлеуметтік және инфрақұрылымдық дамуын қолдау міндеттері бар стратегиялық холдинг ретінде анықталды.

Қордың одан әрі дамуы оның инвестициялық функциясын кезең-кезеңімен күшейтуді көздейді. Осы бағыт шеңберінде халықаралық серіктестермен бірлесіп инвестициялау тетіктерін әзірлеу, қаржыландыру құралдарын кеңейту, сондай-ақ Топ ішінде капиталды бөлудің тиімділігін арттыру бойынша шаралар іске асырылуда.

Бұл тәсілді іске асыру активтерге иелік ету моделінен капиталды басқаруға және әртараптандырылған инвестициялық портфель қалыптастыруға басымдық беруді көздейді.

2030 жылға қарай Қор қолайлы нарық жағдайында әрекет ете отырып және өзінің стратегиялық активтеріндегі мажоритарлық үлесті сақтай отырып, инвестициялық холдингке айналуды жоспарлап отыр.

Қор өзінің бәсекеге қабілеттілігін арттыру және халықаралық деңгейде «перспективті серіктес» ретінде беделін нығайту үшін өз портфелін әртараптандыруға және оны экспортқа бағытталған инновациялық жобалармен толтыруға ұмтылады.